2020年,某公司研發出「美臉秀秀」,可以用手機Apps,執自己個樣,
大眼尖面高鼻磨皮瘦腰豐胸......一切美圖秀秀嘅功能,可以直接應用喺身上,
從此世上再無醜男醜女,再無貨不對版。
(
時至2050年,幾乎所有人都安裝咗「美臉秀秀」,
而整容、化妝、護膚,一系列嘅產業已經執晒笠,連真正嘅美圖秀秀都無人再用。
街上嘅廣告牌變為:「美臉秀秀進階班,如何在芸芸美女中脫穎而出?」、
「美臉秀秀推出新功能,跨次元美臉,瞬間化身古典美人!」

但係我,無安裝「美臉秀秀」,
我唔靚,我只係唔想同其他人一模一樣。

每個人一開始,都只係有少少唔滿意,諗住click一下,消除一粒暗瘡就算,
但一粒暗瘡之後,就到一條皺紋、嘴唇嘅顏色、臉型鼻型......變成100分美人。

因為唔肯用「美臉秀秀」,我自細就俾人歧視,更加唔好話拍拖,
但點估得到,廿五歲果年,我遇到阿光,
阿光屋企好有錢,佢自己溫柔又有才華又靚仔......雖然依加人人都靚仔。
總之,阿光呢個筍盤一見到我,就瘋狂追求,話覺得我好真好pure好true,
我好感動,雖然佢自己都用咗美臉秀秀,但佢居然理解我!

好快我地就訂咗婚,下個月就結婚,當日會有好多親戚黎。
今日去阿光屋企,佢畀咗張紙我,叫我溫書,廢事認錯佢啲親戚。
張紙無相,只有名同號碼,
自從「美臉秀秀」推出後,幾乎人人長相都一樣,加上可以任意改變,無辦法再用樣貌鑒別身份,

所以政府規定,每個用過「美臉秀秀」嘅人,頸上都會刻住一個號碼,大家就靠號碼認人。
我好努力背:「三姨媽,U283606、四舅父,M182478......」

背吓背吓,阿光話:「食得飯啦,入黎我間房。」
點解喺房食飯?見阿光鬼鬼祟祟,我估佢有驚喜畀我,好開心咁入咗房。
一入房,阿光就反手鎖咗門,
間房佈置到好似手術室咁,床邊仲有個伯伯,一睇佢滿臉皺紋,就知佢無用「美臉秀秀」,
肯定唔係阿光屋企人,佢全家都好貪靚。

阿光指住伯伯:「呢位係張醫生,三十年前,佢係最出名嘅整容醫生。」
整容?我諗一諗先知咩黎,呢個名詞早已成為歷史。
「果個『美臉秀秀』,搞到無人幫襯我,我死都唔會用架!」張醫生望住我條無號碼嘅頸:「咦,難得遇到個後生無用過『美臉秀秀』,我終於可以大展拳腳!」
我退咗兩步:「阿光,做咩搵個整容醫生黎?我又無諗住整容。」

下集:https://post.shikoto.com/posts/116464-如果,你可以直接ps自己塊面(下)