上集：https://post.shikoto.com/posts/115762-作為老人院護理員，我嘅任務係：殺老人（上）
喺二樓第一日，我照樣收到張紙，但只有兩個號碼，仲連埋兩個老人嘅病歷，連性格都寫埋，非常詳細。
呢次我唔敢亂黎，連續幾晚，我都細心觀察，
無護理員拎住枕頭行黎行去，無人被毒死，似乎真係一間正常嘅老人院。
直到有一日，有間房好嘈，我趕過去，只見C房門口企咗幾個同事，房門緊閉，裡面喊打喊殺，仲有尖叫聲。
「兩個老野打架，好似鎖咗門。」龍哥一路講，一路用鎖匙鎖埋道門，然後將鎖匙扔埋一邊：「哎呀，一時三刻搵唔到鎖匙添，打畀開鎖佬先。」
我仲未反應得過黎，就聽到兩個同事竊竊私語：
「龍哥真係醒目，將兩個暴躁老伯擺埋一間房，唔知今次死一個定同歸於盡？」
「龍哥仲要唔平均分配資源，你多隻雞脾，我多條褲咁，兩個老野實打架殺命啦。」
佢地發現我偷聽，拍拍我肩膀：「岩岩係一樓升上黎？學野啦，呢層啲員工都係食腦嘅。」
「食腦？」
同事A答：「一樓啲老野有末期病，警察唔會深究，隨便整死就得；
呢層唔同架，死得蹊蹺會驗屍，所以要畀個合理死因，時限通常都長啲。」
同事B舉例：「呢層各有各絕活，光仔識小小營養學，啲老野唔岩食乜，就畀乜佢地食；琳妹愛好電影，引啲心臟病老野睇恐怖片；
揚叔最犀利，日日同啲老野傾計，搞到佢地生無可戀，上個月就有三單自殺。」
龍哥插嘴：「唔係我地點會咁高人工？」
究竟要幾狠心，先可以將自己無病無痛嘅長輩，送入呢間「安」老院？
我用咗半個月，同我「負責」嘅祥伯、福伯混熟咗，福伯仲話我好似佢個孫，
之前喺一樓，我仲可以呃自己，係幫末期病嘅老人解脫，
呢次我點落到手？
臨近過年，有同事問：「阿文，你個福伯就黎到期，使唔使我幫手？」
「我自己黎。」
我決定，自己，救走福伯！
我知道呢班人心狠手辣，既然我都要搏命去救，不如救晒所有人。
通常過年大家唔殺人，夜晚無所事事，會喺休息室hea，
我喺員工飯菜度落咗安眠藥，迷暈晒所有當更嘅同事。
再叫醒啲老人，話火燭，叫佢地快啲走，我已經喺出面Book咗架大巴。
一樓、二樓......亦有老人扶住行動不便嘅其他人，跌跌撞撞咁疏散，
救埋三樓，我地就一齊逃出生天！
我衝上我從來無去過嘅三樓，究竟會係點樣嘅人間煉獄？
三樓好靚，豪華套房，間間都有大電視，不愧廿萬一個月。
但幾靚都係殺人嘅地方，我衝入第一間房，搖醒個婆婆：「火燭啊！快啲走。」
「點解無火警鐘聲？」婆婆打開床頭燈，望住我，個樣好精明：「我無見過你？你唔係我地呢層嘅護理員。」
「殺人？點殺法？」精明婆婆拉住我問長問短，我雖然心急，但又唔忍心留佢喺度等死，唯有儘量解釋。
解釋咗一陣，背後忽然人聲沸騰，一堆同事衝咗入黎捉住我。
點解會咁？明明安眠藥藥效未過。
精明婆婆笑住解釋：「我偷偷撳咗床邊個警鐘。」
「你唔信我？呢度真係殺人架！」我聲嘶力竭。
婆婆拎遙控器，打開個電視，係一樓同二樓嘅監視畫面，
佢再撳多幾下，畫面就番到去C房打架果一幕，
兩個老人，互相撕咬、捏頸，用硬物扑對方個頭......直到斷氣。
再撳、再撳......一直撳到我第一次焗死人。
「殺人？係咪咁殺？」精明婆婆笑得好開心：「我畀廿萬一個月，就係為咗睇直播殺人咋。
我周身病痛，本來都生無可戀，係呢度見到有咁多人慘過我，先發現大地在我腳下！
我舒舒服服俾人服侍，佢地慒盛盛俾人當豬劏，好爽！」
壓住我果個同事，細細聲講：「三樓，全部都係婆婆呢種......尊貴客戶。呢啲叫一站式服務，殺一次人收兩家錢。」
我聽到嘅最後一句說話，係個婆婆興奮嘅聲音：
「睇黎睇去都係劏老野，呢次有後生仔睇啦！」
－完－
