上集：https://post.shikoto.com/posts/115499-作為一盞神燈，我遇到個港女（上）

阿靜訓喺浴缸入面，氣若遊絲，成缸都係血水。
佢用盡全身嘅力氣，擠出一句說話：「我第二個願望係......要番個腎，馬上康復，健健康康。」
事態緊急，我即刻實現佢嘅願望。
阿靜成頭冷汗，慢慢由浴缸爬出黎，咬牙切齒咁望住我：「你話幫我搵個男朋友，識欣賞我嘅內涵，結果呢？
原來Joseph接近我，係因為佢阿媽要換腎，我個腎岩佢阿媽用啊！你差啲害死我。」

無理由，「神燈Google」唔會講大話......
我打開搜索記錄，居然有一行小字：
「『涵』及其後字詞無法查詢，因為神燈Google的查詢上限是20個字。」
所以Joseph果一行嘅描述係：
「靚仔有錢幽默溫柔有才華六舊腹肌，欣賞我嘅內......臟。」

哎呀，果日太匆忙，無睇清楚添。

「咁就無咗兩個願望，你賠番畀我！」
「如果妳唔係咁貪心，又要靚仔又要腹肌，都唔會過搜索上限......」望住阿靜凶狠嘅眼神，我改口：「件事已經發生咗，我都無辦法。最多到第三個願望，我會盡力做好佢。」
「我要多三個願望！」阿靜反應好快。
「無得咁架，根據《神燈使用說明》第32條......」
阿靜打斷我：「神燈都有使用說明？」
「乜都有使用說明架啦，係你地啲現代人，睇都唔睇就撳『同意』。」我搵番本使用說明畀佢。
「不可增加願望數量、不可許願要神燈做奴隸、不可威脅勒索誹謗強姦......喂，咁多條款嘅？」阿靜皺晒眉頭。
「妳研究下，諗到第三個願望再話我知。」

我以為，阿靜點都要諗番一年半載，甚至可能佢生活太美滿，慢慢忘記我。
點知，佢第二日就召喚我：「我諗到啦，第三個願望，我要你做我嘅觀音兵！」

我咁見多識廣都呆咗：「要我做兵？可以架咩？」
「嗱，使用說明話，唔可以叫你做奴隸，但兵又唔等於奴隸。」阿靜指住自己：「同埋我咁靚女，收你做兵，都係好合理嘅關係。」

其實如果我唔想，我都可以拒絕，始終使用說明仲有一句：「最終解釋權歸本公司所有」。
但係結果，我都做咗阿靜嘅觀音兵，日夜服侍女神，隨傳隨到，
阿靜亦得到無限嘅願望，代價只係偶爾SD相畀我做軍糧。
因為佢靚女。
我係一盞神燈，雄性嘅神燈。

後來，我睇咗本小說叫《港女九陰真經VS女神孫子兵法》，裡面有描述觀音兵嘅分類，
我以為兵就係兵，原來兵仲有好多種，例如有「騎兵」......
我真係好後悔，當日無講清楚要做咩兵，令我錯失咗呢個福利。
我係一盞神燈，後悔嘅神燈。

－完－