上集：https://post.shikoto.com/posts/113691

阿瑩推開我，攬住我嫲嫲：「我知您得祥仔一個孫，您地感情咁好，您都想佢成家立室......」
阿瑩愈講愈細聲，我靜係聽到最後果句：「您八十幾歲，除咗呢件事，都無野可以幫到祥仔，第日周身病痛仲連累佢。」
阿瑩好滿意咁鬆開嫲嫲，去同地產經紀講野。
而我，見到嫲嫲呆晒，我唔知講咩好。

老豆死後，我無錢交租，住喺阿瑩屋企，日日畀佢阿媽嘲諷。我都好大壓力，好想......買樓。
就係果一下猶豫，嫲嫲突然衝出露台，用拐杖一撐，連爬帶滾咁跌咗落去。
我從來無見過嫲嫲咁靈活，十八樓，粉身碎骨。

我喊咗好耐，但等警察調查完，確定嫲嫲係自殺，將個單位解封果日，
我同阿瑩都係拎住支票，去地產公司落訂。
「對唔住，個單位已經畀呢位太太訂咗。」
阿瑩捉住經紀：「咩話？你尋晚打畀我地，話個單位平咗一半，叫我地今日落訂架！」

「呢位太太肯畀七成，即係三百五十萬。」經紀指住隔離個女人。

個女人不屑咁望住我地：「你地未落訂，梗係價高者得。如果你地畀八成，賣家都會撻我訂，賣畀你地。點啊，有無錢？」
如果我有咁多錢，嫲嫲就唔使死。
阿瑩尖叫：「果間兇宅黎！妳買黎做乜？」
「我知，有個鄉下婆怕老，跳樓死咗。自殺啫，怨氣唔重，最多封咗個露台，兇殺我就驚啦。」
「果個係我嫲嫲......」我就黎喊出聲。
個女人嗤笑一聲：「依加法例規定，家屬可以平價買兇宅？政府做帛金畀你？」

我嫲嫲......就咁死咗。
層樓......俾人買咗。
「我可唔可以上多一次去，拜吓我嫲嫲？」
個女人勉為其難咁點頭：「好啦，記住叫你嫲嫲早啲投胎，唔好黎煩我。」

經紀幫我開門，畀我同阿瑩入去：「我係樓下等你地，節哀順變。」

阿瑩望住間空屋，不斷講：「間屋本來係我地架！點解會買唔到？」
「啪」一聲，阿瑩後腦流晒血，
我用門後面枝掃帚棍，打咗佢一棍。
「你痴咗線？」阿瑩尖叫，拎出電話正想報警。
我一棍就打爛佢個電話，再一棍、再一棍，佢俾我打到趴係度。

「阿瑩，岩岩個女人話，兇殺佢就驚啦，兇殺......層樓會再平啲。」
我一路講，一路扑，阿瑩愈黎愈細聲，無再辯駁，睇黎佢接受我嘅解釋，佢都肯為買樓大業而犧牲，真係好老婆。
掃帚棍斷咗，望住奄奄一息嘅阿瑩，我一腳踩落佢條頸度，
咔嚓，大功告成。

我搵到把剪刀，剪開佢嘅動脈，將啲血儘量塗喺牆上，聽講兇宅場面愈恐怖，樓價愈低。
我忙咗半日，成間屋都佈滿我嘅傑作，我身上嘅血都開始乾，
門口傳來鎖匙聲，應該係經紀番黎搵我，

嘿嘿，今次我仲唔買到樓？