「今年內，你買唔到樓，我地就分手。」
阿瑩嘅「一年之約」，好似一個魔咒，日日夜夜喺我腦海盤旋。
點樣喺一年內買到樓？大部份人，都會諗起老豆。
「祥仔，呢廿萬就畀你同阿瑩結婚，老豆得咁多咋。」
廿萬？我唔清楚老豆經濟狀況，只知佢以前係老闆，公司執笠後，佢去咗打工。
爛船都有三斤釘，而且我地仲住緊私樓，佢點會得廿萬？
我地日嘈夜嘈，佢都唔肯再畀一分錢。
「你老豆得你一個仔，留番啲錢畀邊個？佢有私生子？」阿瑩翻晒白眼。
「私生子就無啦，佢幾年前搞過一夜情，已經後悔到死。」
阿瑩瞪大眼：「嘩，你阿媽知唔知？」
「梗係唔知啦！阿媽有情緒病，激動起黎好大鑊。我同老豆嘈交，都要瞞住阿媽。」
阿瑩沉默咗一陣，突然問：「你阿媽知道咗，會唔會離婚？」
我聽唔明。
「妳叫我出賣我老豆？」我好震驚。
「講真相啫，你阿媽有知情權。」阿瑩又細細聲講：「你老豆收埋啲錢唔畀你，都唔當你係仔啦。」
阿瑩日夜糾纏，我掙扎咗幾日，決定話畀阿媽知，老豆有過一夜情。
始終我阿媽有知情權...... 人總係會為自己嘅行為，搵到最合理嘅解釋。
果晚老豆放工前，我話咗畀阿媽知，然後即刻落街。
等老豆番到屋企，自己面對。
幾個鐘後，我電話響，唔係老豆唔係阿媽，
係警察。
阿媽一怒之下，用菜刀偷襲，斬死咗老豆。
我成個人係咁震，阿瑩不斷安慰我：「你講真相啫，係你阿媽自己揀咁做。」
阿媽認罪，未判，應該會入精神病院。
我清點老豆遺產果陣，發現佢真係無錢，之前佢生意失敗，欠咗一大筆債，已經賣咗層樓。
佢每個月嘅人工，就係用晒黎租樓、陪阿媽睇醫生。
果廿萬，真係老豆嘅全部。
鄉下嘅嫲嫲聽到消息，黎香港搵我。
「祥仔，你阿爸過咗身，你要好好生活，唔好再令嫲嫲傷心。」
「嫲嫲放心，我同祥仔已經計劃結婚，我地睇中咗層樓，五百呎。」阿瑩語氣一轉：「不過層樓五百萬，首期都要百五萬，我地又唔夠錢......」
嫲嫲拎出一堆皺晒嘅紙幣，個樣好愧疚：「呢啲係嫲嫲嘅棺材本，得三萬蚊。嫲嫲無本事，幫唔到祥仔。」
阿瑩本來皺晒眉，突然展現一個甜美嘅笑容：「嫲嫲，其實您可以幫我地。」
吓，阿瑩都知，嫲嫲真係無錢。
阿瑩無解釋，帶咗嫲嫲去睇樓。
「呢度交通方便，第日我同祥仔生小朋友，都夠地方住，校網又好。」
阿瑩一路講，嫲嫲不斷點頭，聽到「生小朋友」仲笑咗。
「就係太貴囉，聽講兇宅會平一半，平一半我地就夠錢啦。唉，點解無人喺呢個單位跳樓？」阿瑩避過地產經紀，特登自言自語。
我將阿瑩拉埋一邊：「妳叫我嫲嫲去跳樓？妳咁想買兇宅，去第度買。」
「兇宅陰氣重，我唔驚第日小朋友都驚。但死果個係你嫲嫲，佢一定唔會害你屋企人，我住都住得安心。」
