追一個靚女，一個唔小心，當十年兵都做唔到將軍。
而韋小寶唔靚仔、文盲一個、出身低下階層，
呢個Package都追到七個靚老婆，到底有咩祕訣？

  1. 識得哄女仔
    女人，咩時候都要哄，追緊果陣要哄，追到手都要繼續哄。
    韋小寶第一次見雙兒，以為佢係妖精女鬼，未打算追架，
    但一開口就講：「好似你咁靚嘅妖精，被你迷死都抵啦。」唔放棄任何一個哄女仔嘅機會。
    到雙兒做咗韋小寶嘅妹仔，到咗手，無論韋小寶點對佢，佢都唔會離開。

但韋小寶都成日讚佢「好雙兒」，雙兒話自己係豬八戒，韋小寶即刻答：「猪八戒有你咁靚，唐僧都唔捨得出家。」

  • 唔好千依百順
    乜都聽晒女仔話，百般討好，只會變成觀音兵。
    追女仔，要付出、要幫忙，但時刻記住，自己嘅目標係追佢，就要令佢感受到，自己同其他男人有咩唔同。
    方怡有個男朋友，俾人捉咗，請韋小寶幫手救。韋小寶有救，救咗先顯得自己有能力、關心方怡。
    但救完之後，韋小寶就設計好多劇情，顯示畀方怡睇，個男友點樣配唔起佢，自己先係最好。

  • 百貨應百客
    愛情呢回事，屬於一把鑰匙開一把鎖。個女仔係咩人，就要針對性咁對待佢。
    如果佢魂繫豪門，你偏偏要扮文青，咁注定追唔到。

    • 例如建寧係刁蠻公主，由細到大都比人奉承尊敬，韋小寶就對佢特別霸道，做降伏佢嘅主人。
    沐劍屏係天真無邪小妹妹，韋小寶就花樣百出，開下玩笑，陪佢玩無聊遊戲，做佢嘅玩伴。

    呢三點做得好，應該會有一個老婆，
    咦，點解韋小寶有七個？
    因為佢仲有一個特點：唔挑剔。
    只要靚+佢可以追到，佢就會出手。
    如果又要靚、又要身材、又要志趣相投、又要聰明溫柔肯挨（下刪一百字）......
    下下都要完美女神，即使你搵到，都未必追到啦。