凌晨時分，夜無眠，加上飢餓的煎熬，我鼓起了人生中其中一次最大的勇氣，毅然離開了和暖的被窩，走到廚房找食糧充飢。

打開冰箱，一份凋零的空洞隨著一股冷空氣洶湧而至，在斗大的冰箱內，除了一大堆的醬料外，便剩下一條方包，一條過期的方包。

無奈，壓倒性的空腹感此際正如一頭洪水猛獸在我體內聲嘶力竭地咆哮著，並指使著我不要再作任何思量，即便用任何能放進口的東西來填滿那只剩酸液的胃部好了。於是，我只有乖乖的從冰箱中拿出了那條過期的方包，然後坐到餐桌前，準備餵哺那頭發了瘋的猛獸。

然而，當我坐下，想要從包裝中取出一片方包時，一把聲音清晰地在我耳際中迴響：「我過期架，你都食？」

不知是否強烈的空腹感弄致我有點神智不清，但我確切地聽到，那是方包說的一句話。當刻，我竟沒有絲毫的驚訝與惶恐，反之是一陣前所未有的平和，並且感到格外的有趣，於是，我和方包，於這個無眠夜深，開始了一場哲學性的思辯，或可稱作「吹水」。

包：我過期㗎，你都食？
我：有咩所謂？反正，我都係過期㗎喇。
包：你好人好姐又點過期呀大佬？
我：喂，今時今日你唔識拍片，整網站，用facebook、instagram同wechat，你就係過期喇。
包：咁唔係叫過期，係過時啫。仲有得救。
我：點救呀？
包：學囉！
我：無興趣呀嘛大佬。

包：三十幾歲人你唔係仲講興趣呀？
我：咁講咩呀？
包：梗係講理想喇！
我：嘩！唔怪得你過晒期咯。
包：係講理想生活！直接啲講，即係錢，嗱，醒條橋過你喇。
我：嘩！又咁客氣？
包：我地一齊攪啲野，拍住上！
我：同你？
包：係呀！嗱，你每星期搵幾晚搵我出黎吹下水，然後就靜雞雞錄低我地嘅吹水內容，之後放上網，搏一搏，可能出到位，跟住就發達㗎喇。
我：唔係呀？我地？一個過期一個過時，咁樣吹水都有人睇？
包：喂！家下個網絡世界係咁㗎喇，你邊估到咩野得咩野唔得㗎？
我：咁點解要靜雞雞錄呢？
包：講到明錄，好似做show咁，唔自然呀嘛，家下啲野最緊要夠自然，夠真心，夠赤裸！常識吧！
我：吓？
包：試下咋嘛，唔得又無蝕嘅！唔係喇，唔好嘥左今次嘅吹水，你求其憑記憶寫返低佢擺上網俾人睇，試下水溫先喇。
我：頭先我地講個啲？嚴格黎講唔係吹水，係叫鳩吹喎。
包：試下咋嘛！喂夜喇，隊返我入雪櫃喇！記住寫呀！

最後，沒來由的驅使，我還是順從了方包的說話，把過期的它「隊」回冰箱內，再寫下了這篇文章。

凌晨時分，夜無眠，加上飢餓的煎熬，我鼓起了人生中其中一次最大的勇氣，毅然離開了和暖的被窩，然後，和方包吹了一夜水。