「D港女貪慕虛榮，成日要男友買名牌，食餐飯都要人請。」
見到充滿怨氣嘅Post，我果斷留言：「唔係全部女仔都係咁，我最鍾意男友送自製嘅小禮物，食飯都AA制，放假就叫佢陪我行山。」
即刻有人回覆：「妳男友真係有福」、「香港好少有性格咁好嘅女仔」。
係架，我同意。
每次睇到呢D Post，我都會沾沾自喜，婉轉地炫耀下自己有幾與眾不同，
直到有一日，我收到快遞嘅一隻手錶，又幾岩戴。
「歡迎使用『付出比較錶』，呢隻錶可以計算戀人嘅付出，睇下妳係咪一個好女友。」
隻錶識發聲，Siri黎？邊個送架？
「當妳嘅付出指數，比男友阿揚少一百倍，就會分手。接唔接受挑戰？」
無啦啦講乜分手，我想除低隻錶，但點扯都除唔甩。
「直到妳同阿揚分手，或者一年後仲一齊緊，隻錶先除得甩。」
「Challenge accepted！計算開始。」
瞓覺前我照常打俾阿揚，傾咗一個鐘電話。
「嘟，男友付出指數+1」
我唔太滿意：「點解我地兩個傾電話，剩係佢加付出指數？」
「嘟，因為妳鍾意阿揚陪妳傾電話，而阿揚放工好攰，為咗妳開心先陪妳。」
Well，阿揚的確咁講過......算啦，豪俾佢，反正聽日約咗阿揚，我嘅付出指數一定會增加。
我地約好一齊去行山，我連裝備都幫佢準備好，途中又噓寒問暖，開開心心過咗一日。
「嘟，男友付出指數+3」
做咩又係得佢加？隻錶都唔make sense嘅。
阿揚生日，我花咗好多時間，畫咗幅畫，居然只加咗1點。
奇怪嘅係，大家都送手作禮物，佢嘅付出指數居然加咗3點。
我得出結論：隻「付出比較錶」亂黎，唔使理佢，都唔會有魔力令我地分手，
半年後，阿揚嘅付出指數多過我100倍，
同一日，我收到阿揚嘅分手Msg：「對唔住，我地唔適合。」
然後，隻錶自動鬆開咗。
我喊咗好耐，都唔明點解會分手。我性格咁好，有咩會唔適合？
兩個月後，我喺fb見到「阿揚同阿花in a relationship」，
邊個係阿花？撳入佢fb，見到全部都係名牌、飲飲食食咁，超級膚淺，
呢種港女點配得起我嘅阿揚？
我心生一計，將隻「付出比較錶」寄咗去阿花間公司。
無幾耐，果然喺fb見到，阿花戴住果隻邪惡嘅錶，
嘿嘿，估計沒多久，你倆就分手。
到時阿揚就會發現我有幾好，番黎我身邊。
