是咁的。

由細到大，都係聽到有D人講一世人聽到最多果三個字係：

對唔住……唔好意思，我崇洋鐘意講Sorry。

我愛你……單身緊啊，唔好同我提呢三個字。

多謝你……都話祟洋啊，講Thank you。

但其實畢業之後，出到黎社會做野，成日聽到既三個字多左好多，而且，我可以肯定咁話，呢D三字真言難聽過粗口，你地一定會聽過，而且，你地都一定會講過。若以下一系列既三字真言會令你，煩燥不安既話，我只可以講一句，放左工慢慢發泄啦你。又或者睇完好感觸的話，我只可以拍一拍你個膀頭叫你加油。

人在職場，每每都會遇到與同事討論工作，甚至係對質既時侯，有三個字我每次聽到，真係火都黎，但當然，我係一個EQ 極高既人，一定忍到，更何況我只係一個Small Potato。

咁究竟，呢三個字係咩野字呢？

大家準備好你地既情緒，唔好因為燥底而掟部電話又或者一拳打爛部電腦。

好，唔講咁多廢話，第一個職場三字經係……

講埋呢句先，煩請紙言如果想Share 篇文去Facebook 時，係呢度就可以Cut 文，謝謝。

入正題，講咁耐其實我所指果D三字真言係D咩？其實，我比左個名佢地，就係「職場粗口」。

「理論上，如果呢度係岩的話，果度無理由會錯……」

「理論上，如果有左呢舊野，所有事就可以一切正常……」

「理論上……理論上……」

每次聽到D人對住我講呢三個字，就覺得佢係度問侯緊我娘親一樣，理論上，理論上，一聽起我就扯火，你果D理論係根據邊篇論文引述先，你唔好同我講係維基百科啊，維基百科D料我讀書果陣時已經唔用啦。

而最大問題係，佢地個理論上通常係來自同一個教授，係邊個啊？Professor Me 囉未係。次次呢D人一講理論上就好似自己D 野一定係岩晒，呢三個字何只係可圈可點，直頭係可以撥亂反正。

「理論上，只要你肯貯錢，就一定買到樓。」係，鬼唔知積少成多，但係你都要睇下而家下限個數，就快得天文台先會計度啊……姐係天文數字。

「理論上，你跳入海入面只要你堅持唔呼吸，你就唔會比水嗆到。」咁一定架，你唔呼吸D水一定唔會倒流入你個口入面架，但係你會窒息死囉天才，你不如講，理論上，只要你跳樓後，落地果下識卸左道力就無事，仲可以跳多幾次添啦。

「理論上，返工既人就係預左要開OT。」好多人聽到呢句後，一定係以為係老闆啊，上司啊呢類型既生物講既，但係，錯！錯啊！呢句說話係有次我OT果陣時，坐係我隔離個同事親口講架。果陣時我心諗，你係未真係咁熱愛你份工作啊，係的話你早D同我講啦，我同你工作性質差唔多，你做埋我果份嘛。

如是者佢真係做埋我果份，因為我辭左職無做。

但係佢講呢句果下，我真心覺得佢係未壓力太大做到傻左，定係食錯藥，又或者未食藥呢。定係，有病果個其實係我……

而通常……其實……可能……我自己都用過呢三個字。

咁粗口你唔講就人地講架啦，大家都有把口，都會有講粗口既權利。

不過，我就鐘意係每次人地講理論上果陣，講以下呢三個字。

「實際上，你呢個野整錯左，未會整到其他都錯埋一份囉。」

「實際上，你要呢舊野的話唔係唔得，但係個價錢你比唔比得起啊。」

呢三個字，簡直就係理論上既剋星，正所謂「既生瑜，何生亮，理論上，實際上」。

但係通常實際上呢三個字，都係D 高層先會用到……

除左理論上，實際上呢兩句職場粗口外，有一句係相對地溫和。咩話，粗口都有溫和架？緊係有啦，你下次講粗口講陣比D感情，用一把柔和既聲線去講，未可以達到溫和囉。

你唔好以為我係度講笑啊，因為以下呢句，用咁既語氣講，係會事半功陪架。

「不如咁，我地試下咁樣做睇下得唔得？」

「不如咁，我地換另一個角度去睇呢件事，可能會對件事情有幫助。」

「不如咁……不如咁……」

係未呢，如果你係用我剛才所講既語氣去幻想，你一定會覺得同你講緊野果個一定係某某男神或女神。

但如果你用好肯定既語氣的話……

「不如咁！我地試下咁樣做睇下得唔得？」

「不如咁！我地換另一個角度去睇呢件事，可能會對件事情有幫助。」

「不如咁！不如咁！」

成件事就會唔同晒，而且突然間你幻想既男神會變成王晶，女神會變成蘇施黃。

係未諗到都打冷震呢，所以下次如果你地要用呢一句職場粗口，記住用柔和聲線去講。

睇到呢到，你地可能會話，聽我咁講其實呢句唔係好嚴重乍WO。就係咁先恐佈，通常不如咁後面跟住既指令，都會同你正在進行中既工作剛好相反。

「不如咁，做B先啦，A其實唔係咁重要。」其實你個A已經做左一半，但係無啦啦殺左個B出黎，仲要加多句A其實唔係咁重要。如果道行唔夠深既兄弟姊妹們聽到，可能真係放低左個A而去左做個B。

但可能你做完B一半，佢又會話：「不如咁，做返A先，B要Hold 一Hold。」

不如咁既威力，就好似慢性毒藥一樣，溫水煮蛙，到時你熟左都唔知發生左咩事。

所以話，呢句職場粗口，勁。

當然，有溫和既粗口，當然有爆烈架啦，呢一句，如果加強語氣講，簡直可以震攝全場！

「唔得！一定要……」通常後面仲會加入一D物件同行動，例如：

「一定要咁做！」

「一定要呢個！」

無錯，好簡短，威力已經十足。但當然，用呢一句既人功力一定要好深厚，何為深厚？功力深厚者，位高權重也。你有幾何見到一個員工仔咁同老闆講野，只有老闆先會咁同自己D細既咁講架咋。當然會有例外，就係你要先準備定一封信，咩信？我諗唔駛講得咁白啦。

無錯，功力唔夠深厚者，就只可以玉石俱焚。

講左咁耐，我諗你地都知道呢四個職場粗口，有無用過我就唔知，但聽就一定聽過。

只不過，其實我地日日既生活入面，有邊D人係唔會講粗口，有邊個地方係會無粗口。如果真係有個地方真係無粗口，你自己都會覺得怪，然後再自己講一句粗口平衡返果個地方既語言水平啦。

所以，職場粗口唔怕聽，唔怕講，只要做好自己既野未得囉，過得自己過得人，就好似莫探員果一句，「比份糧你，一半係要比你黎做野，一半係要比你黎受氣」。

好拿，成晚無訓打字打天光，又係時侯返工。各位兄分姊妹們，共勉之。

－－－－－－－－－－－－－－－－－－－－－－－－－
希望大家可以like 我Facebook Fans Page
同瘋狂地Share 篇文章 XDDD

https://www.facebook.com/tooleostaurus