我叫阿步 跑步個步 今年24歲 無業 出於某d原因 我最近一直思考人生, 思考點解人愈人就覺得世界愈怪 好多由細到大既既定常識都不斷被打破 邪不能勝正 因果報應 人人平等 努力一定會有回報 好心一定會有好報
我不斷思考呢d自細係我世界觀入面既道理就不斷崩解 正當我望住廚房中忙碌煮飯既媽媽
我忽然”醒悟”...或者忘記自己忘記一切所相信既野 先係可以係呢個”世界”度舒適咁生存落去既最佳方法。 清醒有罪 愚者得救 呢八個字好自然咁係我個腦度出現。
咁岩 呢個時候媽媽另轉頭望左我一眼 同我講 落雨啦 你幫我煮住先 我去收衫。
我好自然咁接過媽媽手中既煎pan 哦左一聲 跟住準備開始煎蛋
點知媽媽見到呢個情況 好激動咁抱住一大堆岩岩收既衫沖過黎同我講 你傻左呀? 落雨唔煎得蛋架 你做咩要煎蛋呀? 唔好煎呀! 我俾佢嚇左一跳 但我手中既蛋已經落左煎pan 已經熟左一半。
媽媽呆左咁望住我同我講 點算呀 點解咁快呀 今次玩完啦 無啦無啦 死梗啦...口中不斷念念有詞愈講愈細聲 我隱約聽到 咩開始了 咩世界 咩阻止唔到之類亳無關聯 無意思既野。
老實講 我依家真係俾佢嚇親 如果佢唔係我阿媽我一定會即刻打電話送佢去青山。 正當我諗緊點做先至好既時候 媽媽突然拋低曬d衫直接起跑由窗台跳左落去 我嚇到連聲都出唔到 直頭係呆左係度兩秒 先識反應 我大叫出聲 嚇到口水眼淚鼻涕都控制唔住 成個人坐左係地下度。
我抬頭望住個碟煎到燶曬既煎蛋 我忽然醒唔起自己姓甚名誰 我係邊個? 呢個世界好陌生 我...
(棚棚棚 棚棚棚棚)! 突然大門口傳入極大聲既拍門聲 將我嚇左一跳 同時將我既思緒拉番黎現實 我戰戰競競咁行到門口 思考緊開唔開門好既時候 棚一聲成度門爆開左 有一大班全身白色既人 沖入黎 問我岩先做左d咩 我靜靜望住佢地 嘴角抽搐 咩都講唔到
其中一個白衣人突然問我 你煎左蛋 係唔係? 我好驚恐咁望住佢 本能咁想向後退 但俾佢地一手捉住我膊頭 我即時慘叫 唔關我事架 救命呀 救..
佢地向我個口塞左一舊不知名物體 仲用手強逼我吞左落去 我第一時間既感受係痛 極大既刺痛感 不斷刺向我個腦 我感覺到自己開始流口水 意識開始模糊。已經再聽唔到佢地既對話 只係感覺到自己俾佢地抬起。
就係呢個時候突然有一團黑色既物體沖左入屋 抬起我既白衣身撞開 將空中跌落地既時候 我望清楚左黑色物體既真面目同時全身不斷打冷震 因為個一團”物體”係一隻有好多隻手既巨型蜘蛛 我嚇到再次清醒左好多 我不斷慘叫 啊啊啊啊啊啊啊啊啊啊啊 但怪物無理我 而係將我身邊既白衣人四分五裂 係 係四分五裂 肢體分離 我連起身逃走既勇氣都無 一直望住佢屠殺個班白衣人 最後 佢另轉面望住我 一共係8目交投 佢靜靜咁向我個方向移動 我已經連呼吸既勇氣都失去左 變成左一隻木頭公仔 突然佢其中一隻”腳”踩到岩岩屠殺既時候撞跌左係地下既玻璃相架 個一聲清脆既”格” 喚醒左我最後既求生本能 我用盡全力拎起身邊既矮凳一野車落佢個頭度 然後全速跑向門口。
唔知點解 佢好似無追過黎 我唔敢奢想係個一下扑死左佢 我不斷跑不斷跑 跑左去附近既地鐵站 咁岩有車黎 我望住車門上自己既倒影 驚慌醜陋絕望 正當我邁步入地鐵個下 一下痛到我幾乎失去意識既刺痛從後背襲來 我感覺到自己眼耳口鼻都不斷流血 我哇一聲吐左一大口血出黎 訓低左係地鐵上面 不醒人士。
唔知幾耐之後 我醒左 但全身強烈既疼痛感令我清楚明白岩岩發生既事絕對唔係發夢!
唔係發夢係咩? 一把熟悉女聲由我身後傳來
我嚇左一大跳成個人向前扑 然後我另轉頭又差d再次暈低 因為我見到 ...媽媽
佢無再問我點解我要煎蛋 佢淨係靜靜咁拎條毛巾出黎抹左幾下我塊面 問我仲有邊度痛? 肚唔肚餓
我...我崩潰嚎哭式咁問佢 點解你要自殺 點解落雨唔煎得蛋 個班白衣人係邊個 點...
突然我停低望住佢個副熟悉但又面無表情既樣 我徹底定左落黎 我深呼吸左一下 然後用盡全身既力大叫你唔係我媽媽 夠彊你就一槍打撚死我 阿叔嚇大既 屌你老母
但佢面無表情咁繼續講 你攰啦 唔好再講啦 洗個面 早d休息啦 聽日仲要番工 跟住就強行禁低左我個頭跟住幫我襟被就同我細個一模一樣...
襟被...? 我向上望 我竟然番左自己間房 屋企完全同平時一樣 就好似岩岩既屠殺完全唔存在 就連我面上既傷消失得一乾二淨!
“媽媽”面無表情咁話 好夜啦 唔好諗咁多野啦。
跟住就轉身走左....
我完全接受唔到 唔通真係一場夢? 無可能 所有細節我都仲一清二楚 無可能架! 我直接起身 行出間房 無視媽媽既視線走左入廚房 望左一眼出面既天氣 係落雨!
我一手拎起左隻煎pan 再拎起台面既蛋 我另轉面望左一眼”媽媽”既表情 一野煎左落去
“嗞”
都無發生 “媽媽”仍然係廚房門口面無表情咁望住我
我話 我煎左蛋
“媽媽”我唔肚餓 你食啦
我情緒激動咁大叫 出面落雨wo! 我煎蛋啵!
“媽媽”面無表情咁望左我幾秒 話 我唔肚餓 你食啦。 然後就走左
靜低我自己一個留係廚房 望住又燶曬既蛋
最後我無食到隻蛋 我番左上床 望住天花板 不斷思考 到底我係唔係發緊夢 定係痴左線 當我差唔多說服自己係痴左線 接受”現實”既時候 差唔多訓著既時候 突然我感受到一鼓極強烈既刺痛由背脊出現 係一瞬間就痛到全身清醒曬既劇痛!
“嗚呀!” 我痛到眼淚都流埋出黎 無力感瞬間充斥四肢 絕對係受左重傷既症狀!
我即時落床檢查背脊 但根本無辦法搵到任何傷口或者傷痕。 我只好說服自己係心理影響生理出廳拎杯水就訓教
當我拎完水準備番屋既時候 一種前所未有既違和感湧上心頭 令我另轉頭望左一眼 “應該”係電視機頂用玻璃相架裝住既全家幅
...唔見左
我即刻去檢查門口旁邊既矮凳..亦無搵唔到
我開始懷疑屋企到底有無呢兩樣野 我即刻問”媽媽”
你有無見過電視機上面既全家幅同埋門口旁邊既矮凳?
“媽媽”語帶命令咁講 無 點解你仲唔訓? 即刻去訓教!
我自言自語咁講 嗯..睇黎我推斷無錯 有問題! 果然有問題!
“媽媽”冷冰冰咁望住我講 你今晚仲未癲夠? 去訓啦!
我直接無視佢既問題質問佢 點解我背脊會突然間咁痛 ? 白衣人去曬邊? 怪物呢?你將佢地收埋左去邊度? 講呀！
"媽媽" 靜靜咁聽完我講 突然表情一轉 好痛心疾首咁望住我講 阿步 我真係好攰啦 點解你會變成咁架? 你聽我講 你其實有精神病....你成日幻想好多野出黎問我 但我已經好攰啦 我好厭倦每日每夜咁聽你講點解咩樣點解咩野 一時又怪物一時又被人追殺 好真係好攰啦 求下你乖啦 唔好再問啦 放過我啦好唔好?
我無應佢 因為我不斷咁思考緊 思考緊每一樣我記得既野 因為我發現我記得既野好少 少得可憐 我唔知媽媽既職業 我唔知自己有無讀大學 唔知琴日食左咩 甚至唔知爸爸到底存唔存在! 我不斷去思考 不斷去尋找每一樣”正常人”應該要有既野 但我一無所獲 我唯一知道既就係
“媽媽”望住我思考既時候佢既表情變得非常之害怕同不安 所以我決定...
我咩都記起曬了 你唔洗再呃我 畜生! 我語帶憤怒咁講呢句說話
“媽媽”開始抽泣...痛哭
點解...點解個天要咁對你..阿步...!
我睇到佢咁既樣 我內心掀起極大波動 甚至開始懷疑自己真係有精神病而至於折磨緊我唯一既親人 但我依然面不改容咁講 你再扮都只不過係演藝既奴隸 你呃我唔到架!
我一路咬牙切齒咁講 一路走向廚房 好 既然係咁 橫掂你屈我係痴線老呀嘛? 好 我就同你痴線到底!
面容瘋狂既我拎起個隻熟悉既煎pan 開著個火 將一隻又一隻蛋打落去隻pan度
我唯恐”媽媽”唔知我係打緊蛋 我大叫出聲 一隻! 兩隻! 三隻! 四隻!
唔知係我錯覺定點 我既蛋愈打得多 出面既雨愈落就愈大 開始行雷閃電!
“媽媽”終於出現係廚房門口了 佢回復番個種面無表情既神態開口問我 你煎! 夠未?
氣氛變得好似結冰咁沉重 我停低手中既動作 而窗外既雷聲亦適時停低 只剩下微小既雨聲作為背景音效 一切彿如暴風雨前既先兆 平靜得可怕
我同”媽媽”四目交投雙方一動不動 保持對峙
突然! 一度亮光劃光天空 將沉默既黑夜一分為二!
同時我地亦一觸即發 我直接將全盒蛋一野拍爛直接倒落去pan度煎
“媽媽”勢估唔到我會做出如此舉動 想要飛身捉住我隻手已經黎唔切
嘭! 嗞~
兩種聲音幾乎同時出現 以至於令我根本分唔清 到底響徹雲霄既係邊一種...
“媽媽”既身影逐漸變得模糊 世界逐漸崩塌 。
我係一張白色既病床上面醒番 身邊全部都係著白色衫既護士 大家好似都好好奇好驚訝咁望住我
呀係啦 我叫阿步 跑步個步 今年24歲 無業 出於某d原因 我最近一直思考人生, 思考點解人愈人就覺得世界愈怪 好多由細到大既既定常識都不斷被打破 邪不能勝正 因果報應 人人平等 努力一定會有回報 好心一定會有好報
其中一個護士問 阿步你覺得點呀? 有無邊度唔舒服呀? 醫生! 醫生佢醒左呀!
我...我....頭有d暈
醫生話 哦 可能係你昏迷得太耐啦 數一數時間 你已經昏迷左差唔多6年 2015年開始 依家已經2021啦!
呀...?下!
醫生話 係呀 今年係2021年啦 6年啦已經!
點解會咁架 我好似發左一場好長好長既夢 我夢入面...
醫生直接打斷我 阿步你唔好急 好多人昏迷完都係會咁樣 你盡量忘記夢入面發生既野啦 唔好去記住佢地 要記得你已經番到現實啦 我地轉個話題啦! 阿步你最鍾意既係咩呀?
...大波妹
醫生面色尷尬咁話 其實我想問你興趣~ 不過算啦 咁阿步你最唔鍾意係咩呀?
我腦海閃過夢入面被巨型黑色蜘蛛追殺既場面打左個冷震咁答佢 蜘....蛛
醫生滿意咁對左一對手上既病歷紙話 唔錯唔錯 你既記憶睇黎無咩問題! 睇黎好快就出得院啦 你休息下先啦!
我伸手捉住醫生問 醫生 我媽媽呢?
醫生一臉凝重咁講 阿步...你媽媽係你好細個個陣已經離開左你啦 你唔記得啦?
忽然夢裡面既記憶伴隨住個種會令人痛得死去活來既背部劇痛又再出現
我強忍住頭痛問醫生 媽媽 我媽媽到底係邊度 呢度係邊度?
醫生突然變得目無表情 慢慢退後咁講 睇黎仲需要觀察多一段時間 護士...
一群護士將我死死禁住 然後又拎左個團不知名物體出黎 幾乎一模一樣既場景令我更加肯定眼前既護士係由白衣人假扮
分別係 今次再無巨型蜘蛛黎將佢地屠殺 等等....唔通當中有咩關聯?
係我思考既同時佢地已經將個一團不知名物體放左入我口入面逼我吞左佢
我趁機訓低假裝抽搐然後合上眼不醒人事
我慢慢等到旁邊既護士離開先再次睜開雙眼然後第一時間扣喉 用力扣喉
我不斷嘔 不斷嘔 但始終無辦法可以將個一團不知名物體嘔番出黎
正當我心灰意冷既時候 我突然諗到 血...
我用盡全身既力背向病床既一向撞落去 巨大既衝擊力成功令我吐血
當我痛到頭暈眼花懷疑緊自己係唔係真係有精神病既時候 我係地下見到個一團染左血既不知名物體 我就知道
真相已經不遠了...
