係不經不覺之間，生活無聲無色地出現左一啲轉變。

唔知由幾時開始，生活慢慢地變得有規律。

唔知由幾時開始，接受到一個人係餐廳食飯。

唔知由幾時開始，覺得一個人去戲院睇戲係種享受。

唔知由幾時開始，訓覺時間慢慢提早，而且變得定時。

唔知由幾時開始，由期待通頂變到抗拒通頂。

唔知由幾時開始，除夕唔再出去倒數，因為唔想同人迫。

唔知由幾時開始，慢慢地接受到啤酒嘅苦澀味。

唔知由幾時開始，唔再落去夜場蒲。

唔知由幾時開始，失去左個種食極唔會肥嘅體質。

唔知由幾時開始，去放題唔會食到上喉嚨，任飲飲品唔會無節制咁隊可樂。

唔知由幾時開始，食得太飽要消化好耐。

唔知由幾時開始，做多左運動。

唔知由幾時開始，迷上以前根本不屑一看嘅興趣，例如車，例如紅酒，例如錶……

唔知由幾時開始，唔會再計較買一啲瑣碎野嘅價錢。

唔知由幾時開始，戶口儲款持續上升。

唔知由幾時開始，少左時間同朋友見面。

唔知由幾時開始，假日情願留係屋企休息。

唔知由幾時開始，對現在嘅生活感到麻木，想變又唔想逃離comfort zone。

唔知由幾時開始，發覺兩老面上嘅鄒紋又多左幾條，頭髮又白左些少。

唔知由幾時開始，終於發覺時間原來確切地轉動緊，即使自己無向前走嘅感覺。

唔知由幾時開始，經常沉浸係過往嘅回憶入面，搵唔到出口。

唔知由幾時開始，發覺自己，原本慢慢長大，慢慢適應呢個社會，慢慢迎合呢個世界。

提提大家，最年經嘅九十後都已經十七歲。而你亦離個段青蔥歲月越來越遠。

生活係成人世界嘅你，累嗎？

當感覺到累嘅時候，勿忘初衷。

記返起當初目標如何，為生活差一差電。

即使累，人生路都係要繼續走。

雖然命運難改變，但我地可以為生命賦予意義。