A，係Full planner，去旅行好似玩Survival game咁，上山下海鳩嗚觀光乜都齊；每日Full schedule，倒塔咁早起身、夜一夜先返酒店；出發前所有車船酒店巴士乜乜乜已經Book好，淨係跟住個Plan出門口搭車食飯……；每一個旅遊書話值得去嘅景點只會去多無去少；同行旅伴只需要食、行、瞓，唔洗帶腦，去完個旅行分分鐘仲會收到Financial report添。

而B，係Flexible traveler……行出機場個刻，佢都未知自己嗰晚會瞓邊。

阿Ming係我嘅小學同學。我同佢就係近乎A同B兩個極端。今次嘅考驗，係要平安度過東歐之旅二十日。

考驗嘅第一關，係Plan行程。所謂一闊三大，本身我係預咗住Hostel，但佢就堅持要用航空公司Discount訂酒店，總共足足貴咗成兩三千。成條路線嘅計劃、訂機票火車酒店都係我一手包辦，阿Ming咩都話無所謂。

終於都埋牙出發。到埗第二朝，我瞓到十點，望一望佢仲係瞓得好冧，於是我又繼續瞓。到十二點，佢仲未有任何會醒嘅生命跡象，Okay，我換定衫化住妝等。一點鐘，佢終於醒咗，望到我已經換好衫玩緊手機，然後……再倒頭大睡！！我忍唔住出聲叫佢起身。跟住之後每一日，係每一日！！佢都無試過肯早過一點起身，梳洗得嚟兩點先出門口，但歐洲好多景點都係四五點就會閂門。有次又因為太遲起身，最後一日都去唔到梵高博物館，我足足嬲咗成粒鐘唔想同佢講嘢。

仲有一關，係錢。講錢失感情乃係金科玉律。本身諗住食飯、搭車公數出，後來佢每日堅持去貴價餐廳食，餐餐肉眼扒紅酒係基本，我決定分開計錢。自此佢有佢食牛扒，我有我食Pizza，最多間中豪一餐陪佢一齊食。

雖然，成個旅程對住佢我都係暗自躁底，去親咩博物館、教堂、觀景塔，佢都一律話貴唔入；每一日都要陪佢去睇名牌錶、限量版波鞋；尤其係每次趕火車，睇住佢好恣悠淡定咁執行李執到最後一分鐘先出門口，我諗，我真係有動過殺機。之但係，都唔係咁容易搵到一個旅伴會容忍我間間賣明信片嘅鋪頭都要入，每晚等我霸住個廁所成粒鐘沖涼，又會陪我無所事事瞓幾粒鐘草地、踩單車周圍鳩行、飲埋我每餐飲唔晒嘅啤酒。

二十日旅程結束。返到香港機場，阿Ming同我講：

「喂，下年不如一齊去南美吖！最多行程任你Plan，一日十個景點我都陪你Chur喇。」

「無問題吖，你肯早過兩點起身嘅話邊到都有得傾。哈哈哈！Bye-bye！」

網絡作家B612 – Facebook專頁：http://www.facebook.com/b612lpp

（鍾意睇嘅請你去俾個like，支持吓我繼續寫嘢吖！:)）

「倘若有一個人對一朵花情有獨鍾，而那朵花在浩瀚的星河中，僅此一朵。那麼，他只要仰望繁星點點，就心滿意足了。於是他喃喃自語：『我的花就在星河的某個角落』可是，這花一旦被羊吃掉了，瞬間，所有星星也將隨之黯淡無光。那你也認為這不重要嗎？」