其實比一個like仲容易過搵一蚊雞，但一個like既價值又只唔只一蚊雞咁少?對於唔用facebook，或者少用facebook既讀者黎講，一個like真係冇咩意義同埋價值，佢地會答寧願你要一蚊抽下YES卡都好過要like，但同時唔可以否認既係社會上大部份人都好重視like依樣功能。究竟，一個like既用途有幾大? 究竟，一個like既吸引力有幾大?呢樣野只係facebook既用家先會知道，仲要係一經常更新自己狀況既用家。
首先，一個like代表住你到底有幾多朋友，到底有幾多人去關心你。如果你認為全部朋友比like只係單單建基於文中既內容，或者真係太天真，因為朋友比既唔單止係呢個Post既價值，更加係佢對你既觀感。曾經有朋友係facebook分享一篇好有深度的中文客家話教學，係佢自己既心得，類似客家一分鐘咁樣，但係除左我同幾個朋友之外，都冇咩人Like佢。另一位朋友係女仔黎，佢只係up左一張好黑，好似咩都見唔到既圖，打左個我都唔識既英文字，係短短一日之內，佢已經有一百幾個like。朋友比like唔通真係單單睇內容咁簡單?當然如果真係關於個人健康、家庭問題就另作他說。一個like等於既就係朋友同你既相熟程度，或者係對你既個人觀感，或者我唔可以講絕大部份，但佔唔少部份係因為佢個人善交際，多朋友，或者係靚仔靚女，所以先會有咁多like。
其次，一個like代表既可以係公眾對該行動既支持。有時like或者就好似一種支持一樣，唔少公司或者所謂既網絡名人會用Like去換取捐款，好似有一萬人like就會捐一萬，有三萬個like就會直播單手抬起巴士咁樣，點解呢班人唔可以直接捐錢?佢地點解唔可以直接表演，佢地做咩要開出種種既條件呢?因為佢地需要公眾既認同與支持，如果佢地冇通知任何人既情況下，作出呢d行動，咁佢地唔會知道自己有冇人支持佢地，同時唔會知道咁樣做係唔係得到大眾認同。
同時，一個Like代表既係一種表態。點解呢一種係表態呢?因為你可以就住一樣野去決定比唔比like，呢樣適用於大眾公共議題。好似梁振英每當發表言論時，網民都會好自然唔比like，表示唔認同狼英，當梁天琦有咩新聞，我地都會好自然咁比個like，呢個like就係表示你既政治立場。但同時要留意，網上消息既來源，好似港人港地既facebook，自自然然有大把人like，咁係唔係代表梁振英好多人支持?唔係，只係facebook都有佢既局限，就係某個專頁佢地只會集中某一群政治或者意識取態既人。
係呢個網絡咁發達既年代，一個專頁既like，表示自己係得到幾多人支持，一個facebook既post有幾多Like，代表你既人際交友情況係點樣，代表有幾多人關心你，所以facebook某程度可以當做一個統計工具，了解自己既價值，但請讀者留心，呢個價值唔係絕對，因為唔係每個朋友都會用facebook，或者like你既人唔一定係你既真心朋友，可能佢地只係你既hi bye 朋友，佢地比like就好似同你打個招呼一樣，唔一定係你既朋友，只可以肯定佢地多數唔係你既敵人。
點解會有人賣like?因為人往往自自然然用like去衝量一種人或者物品既價值，好似多like就表示佢出名，佢既商品好好用，好有口碑咁樣。當然呢樣唔可以怪責各位讀者，因為筆者都好自己代入左呢種第一觀感，認為佢多like就表示佢好用，佢有口碑，但記唔起原來上網比like係一件好容易既事。
如果你問我一個facebook既like有幾多價值，到最後我會同你講，佢有好多作用，但價值只係因人而異，只可以話facebook既like某程度上牽動住我地既日常生活。
