寵物寵物，唔知大家又有無養過動物？屋企都曾經養過狗、貓、烏龜等。不過，果啲通常都係人地唔要而比我地養。而衰貓係我第一隻，由細睇到佢大嘅貓。
所以今日想講下，我隻衰貓啲野。
其實我一向都好鍾意貓。所以當呀爸唔知係邊度攞左隻貓番黎，我真係超開心。咁跟住就幫隻貓改名啦。於是呀爸就話，隻貓啲花紋似一隻豹，所以就叫豹豹。其實我覺得個名都幾難聽。要知道，我個中文名都好易比人以為係男仔名。（我係女仔呀）咁豹豹，其實都係女仔黎。
我地全家都好錫豹豹。不過豹豹淨係鍾意我呀媽。由朝到夜都跟住我呀媽。呀媽入房訓教，佢就坐係門口訓教。
咁呢，隻貓本身都係貓砂去廁所。後來，呀媽同佢沖涼果時，佢嚇到柯屎柯尿。（呀媽講的）自此，佢就係有水嘅地方先會如廁。例如，廚房嘅鋅盤。不過佢通常都會係馬桶去廁所。有時候仲有同我呀爸爭廁所用。即係呢，佢不停咁爪度門。咁佢去廁所都好講究。佢會係馬桶大便，洗手盆小便。唔係吹水，有片為證。
記得讀中學果陣，我呀媽成日會整早餐比我地。然後去叫我同細佬起身番學。咁呢個時候，豹豹就會出動，偷食我地啲早餐。但係佢通常咬一啖就唔食。可惡嘅豹豹！有時候，佢會偷食啲晚餐。
記得有一次，某寒冬嘅晚上，我訓緊教。跟住我feel到隻腳好似有啲野，於是我起身睇下。原來豹豹捲左入我張被度。
咁有時候，隻貓會自己走左出去。無人知佢走左出街，大家只係以為佢躲起來。直到第二日，見到佢係坐係門口，等人開門比佢。我呀媽話佢走左出街玩，玩到成身沙番屋企。
豹豹對我黎講，係屋企嘅一分子。食晚飯果陣，佢總係會坐係飯桌隔離。如果有多餘嘅椅子，佢就坐係張椅子上，同我地一齊食飯。
我上次番香港，一落機，就問呀媽隻貓點。（我真係不孝）咁呀媽就話豹豹走左出街。到我番到屋企，仲見佢係度。我即刻安心晒。
養寵物其實幾好，佢地有時候會做一啲野，令你哭笑不得。佢地會分享你嘅快樂，你嘅悲傷。
不過，養寵物需要好大責任。唔好當啲寵物只係一份禮物咁，送比女朋友。又或者，見啲貓狗細個果時，好得意，然後收養佢地。然後到大隻左，就唔要佢地。我自己成日去animal shelter做義工見唔少。好多貓狗都比人遺棄係果度。而佢地成日悶悶不樂，希望原來嘅主人黎接佢地。
動物其實都有感情。就好似豹豹咁，佢有時候會嬲，然後唔黎飯桌同我地一齊食飯。你以為佢地咩野都唔識。其實，當佢知道自己病左，會盡量用自己嘅方法話你知，等你帶佢去睇醫生。有一次，豹豹周圍大小二便，甚至係神主枱小便。之後，先發現原來佢病左。
如果你都有一隻寵物，要好好愛護佢地。
今生可以遇到呢隻貓，係我嘅幸福。千千萬萬嘅動物之中，遇到你。（佢仲係度呀，我未畢業，無得番香港見佢炸）
－－－－－－－－－－－－－
張圖係我隻貓－豹豹，係咪好可愛呢？
如果喜歡我的文章，不妨到我的facebook比個like我，支持下我。感謝！
