《愚人節的表白》
愚人節除咗同個Friend講自己有咗大肚之外，最常見嘅整蠱方法仲有咩？──就係表白。
依一日，係一個好特別嘅日子。總所周知，表白，對於任何人嚟講都難以啟齒，因為佢會隨時破壞一段和諧嘅關係。
喺愚人節，男仔總會異常地充滿勇氣跟同第二個女仔講「我愛你」，因為講完無論失敗與否，最尾都可以講一句「愚人節快樂(笑喊Emoji)」抹走。
冇錯，依一句只係用嚟呃下你‧‧‧‧‧‧
因為，今日係愚人節。
咁點解，身邊咁多女仔同埋咁做講可能會令佢誤會，做咩仲要對佢一個玩假表白？其實都唔係幾好笑啫...？要好笑有大把嘢可以呃佢啦，點解對住個位女仔就一定係同佢玩
假表白？
因為，你呃緊自己囉。
因為，你心入面，存有一絲希望，話唔定佢真係接受。
因為，你平時喺佢面前扮嘢扮太耐。
總總原因，令佢成功你第一個玩愚人節假表白嘅女仔。真心講一句，如果嗰個女仔你冇興趣嘅，你邊有咁多閒情同佢咁玩。
但係人就係一種咁嘅生物，就算失敗，都唔想跌得咁痛，因為「愚人節快樂」依一句，就代表緊「我講吓笑渣，唔洗咁認真。」。
但係問心個一句，你內心真係講緊笑咩？
你真係對佢一啲感覺都冇？
如果你對佢冇感覺，又點會咁得閒呃佢話「我愛你」？無可否認，我哋人就係咁口不對心，口事心非。
與其話依一日係「愚人節」，專講大話呃人。不如話，其實依個節日對表白嘅人嚟講，根本係一個真心嘅「表白日」。
或者我哋的確好虛偽，連正正常常對住一個人表白都做唔到，遍遍要喺四月一日，俾一個籍口自己講。
正正係因為你重視依段關係，唔想佢受到任何破壞，所以先依一日講。
成功，就當真係得咗；失敗，就講一句「愚人節快樂」。
所以其實「愚人節」講「我愛你」嘅都好有可能係真心愛你或者暗戀緊你嘅人。
唔好再俾依一句「愚人節快樂」呃到，因為有心嘅話，每一日都可以係「愚人節」，每一秒你都可以隨時欺騙對方。
你就即管睇下，聽日邊一位異性會同你講「我愛你」，對你乘機表白，你話「其實我都鐘意咗你好耐」睇下佢有咩反應。
如果佢想進一步求證，你可以彈返句「愚人節快樂」俾佢，不過我相信佢會立即心碎。
點都好，聽日唯一有一句說話，我相信全港市民聽到一定會激到吐血。
就係，亞視同你講：「愚人節快樂，我哋ATV如常播放！」
───────────
承認吧，其實你超想在四月一號對喜歡的人說一句「我愛你」。
