是咁的，頭先落公司樓下coffee shop買杯咖啡飲。
排隊時見到有對情侶，個女嘅嬲爆爆，男嘅坐立不安。
我心裡暗暗咁期望幾時會摑個男仔或者搵咖啡淋佢個頭。
我喺遠處食花生，聽到以下對話：
　
「妳畀返個電話我先啦。」男。
「你全日都望電話，我真係唔知你同電話拍拖定同我拍拖！」
「咁公司啲客搵我嘛，我已經特登請假出黎陪妳啦。」
「就係囉！你請假但又繼續做嘢，咁不如唔好請！」
　
佢哋愈講愈火，女仔手上揸住男友個電話就不斷響起訊息鈴聲。

　
「個客有緊要事啊，妳畀返我先啦～」
「我唔畀！個客重要定我重要？」
「梗係妳啦～」
　
話雖如此，但個電話每響一下，個男嘅就神經質地全身震一下，不停un腳，又咬手指，個樣好似就黎精神崩潰咁。
　
呢個時候，枱上面塊「提示拎咖啡電子牌」響起。
個男嘅好像撞邪咁，拎起個電子牌擺喺耳邊。
「喂！陳生！唔好意思啊…」
　
「先生，你杯焦糖咖啡。」個侍應唔知攞景定贈興，仲提個男仔拎咖啡。
　
個女嘅自知鬥唔過男生，
啪一聲將個電話擺喺枱面，然後嬲爆爆咁衝出coffee shop。
男嘅一邊覆msg一邊追出去…
　
「先生，你杯咖啡…」個侍應都唔知係咪痴線！
　
Coffee、Mr.Chan or Girlfriend？
有時真係幾難決擇…
　
Ig：BlueGodZi