女朋友小豆係長頭髮，甚至覺得頭髮重要過自己條命…
尤其係個瀏海！簡直猶如聖物一樣，絕不可碰！
　
有一次，因為去開間髮型屋關門大吉，膽粗粗咁試一間望落去正常嘅髮型屋。
點知就出事！髮型師唔知係眼界差定係聽唔清楚…
叫佢剪少少前瀏，變咗剪剩少少瀏海！
一個露眉瀏海嘅女朋友，一出髮型屋就立即進入暴走mode。
　
「妳露眉喎哈哈哈！」就係呢個小小嘅玩笑，女朋友足足嬲咗我成個星期！
　
亦因為咁，佢成個月都戴住帽返工，放假仲唔願出街。經過我不斷遊說佢露眉都好靚，佢心情終於回復返少少
　
據了解，髮型師執起佢瀏海問剪幾多。
「剪少少要遮返住眉吖！」
手起刀落，就變成咁，個髮型師仲話「咁樣啱喇！要襯返成個髮型嘛！」
　

啱？！你搞到佢露眉啊！邊度啱啊？！
知唔知你剪呢一刀！我受咗幾多苦，先等到女朋友頭髮長返？！
　
除咗瀏海，同一個長頭髮嘅女朋喺生活上，仲有好多地方需要注意。
女朋友雖然知道自己係長頭髮，但意識唔到自己係長頭髮…
咩意思呢？
　
每當佢要撥頭髮時，企喺隔離嘅我，塊面就好似被鞭打中咁。不過由於撥頭髮前無乜先兆，所以日子耐咗，我就唔當係一回事，畀頭髮鞭中眼都唔眨一下！
　
另一樣要適應嘅就係訓覺。佢話壓住頭髮訓唔舒服，結果頭髮就向四方八面散開，訓喺隔離嘅我就好似畀隻樹妖纏身咁，啲頭髮成日竄晒入鼻窿，撩極都撩唔走。
　
不過睇黎我都要認命，因為我都覺長頭髮嘅女朋友好靚！
唯一能夠做嘅，就係好好保護呢把秀髮。
每次食麵飲湯，佢一烏低頭總係「頭髮食先」，
我就幫佢撥開啲頭髮。
戴頸巾…撥開啲頭髮。
著大褸…撥開啲頭髮。
揹背囊…撥開啲頭髮。
　
「喂！妳可唔可以記住自己係長頭髮！」我成日都咁同佢講。
　
去旅行為咗加快出門口速度，女朋友化妝我就負責吹頭。
或者得閒幫佢解開打晒Click嘅「髮菜餅」…
有時見到成餅嘢，真係好有衝動想一剪剪咗佢！（細細聲）
　
點都好，女朋友心情同把頭髮係成正比。
頭髮靚佢心情都會靚！
　
－－－－－－－－－－－
最新出版：《無病你呻乜嘢吟》
Ig：BlueGodZi
專頁：http://www.facebook.com/BlueGodzi