作為男子漢，噴剃鬚膏噴到塊臉好似聖誕老人咁，再用剃鬚刀挖啊挖，呢個動作真係充滿魅力。雖然要定期換刀片，膏用晒要買好麻煩，但電鬚刨我一樣會唔記得叉電，所以都係以快感為主。
　
不過就因為咁，出事了！剃鬚刀畀我挖甩咗一片，又無晒替換，等唔切只能夠自己去買。
平日呢啲日用品都係佢幫我買，因為女朋友係對於「折扣」異常執著嘅生物。佢能夠記清晒萬寧每個月幾多號有折，百佳星期幾買最抵…
　
「都係差幾蚊啫。」
「唔得！幾蚊都係錢黎嘛！」
「但係…」我想講佢買新衫總係有聽落好合理又非買不可嘅理由，買少件衫好過啦～
當然啦，為咗個頭唔好畀佢擰甩，我無講出口。
　
好啦，我係男人黎嘛，自己買咪自己買囉～有乜咁難呢？
結果！！我買錯咗…
刀片裝極都裝唔落…
　
我即刻打畀女朋友講返呢件事。
　
「你要跟返個型號買吖嘛咁都唔識！」
「我是一個西伯利亞人，刀片都無分…」
「聽日我幫你買啦，仲有洗面膏係咪用晒？洗唔洗買？」

「要、要……」
「得啦我買埋。」
「唔該。」
「我費事你潤膚膏當洗面膏啊！（真事）」
「不要再說了.jpg…」
　
女朋友小豆記清晒我所需物品，第日買齊帶過黎畀我順便餵我食飯。前一晚，我就發咗個夢…
　
我發夢好似個殘廢咁，訓喺床上面打字，然後女朋友餵我食飯。
「我要屙殊殊～」夢入面我仲扮白痴仔講嘢添。
就喺嗰一刻，我就扎醒咗…
　
第日，女朋友黎同我食飯。我特登揀咗間新餐廳，佢問我點樣去。
　
「哈哈哈，妳唔識去啊？！係咪妳唔識睇地圖啊？等哥哥教妳睇啦～」
「……」
「過馬路睇車啊！車死妳啊盲婆！」
「……」
「點啊？妳帶畀我啲嘢係咪好重呢？不如等哥哥幫妳拎吖～」
　
「藍橙仔你係咪想死…」佢突然間轉咗母夜叉mode，我嚇到即刻講返尋日個夢畀佢聽。點知，女朋友一聽完，就即刻爆笑…
　
「唔怪得你全日都想自尋短見啦，唔緊要喎，我仲係覺得你好叻嫁喎，乖吓…」無錯，其實我只係想搏取返啲地位。
　
「但係，夢入面妳好似想我慢慢變到唔識照顧自己，漸漸變成一個老人痴呆，我就逃唔出妳魔爪。妳…唔會係咁啊可？！」
　
「呃…係囉。」
　
「點解妳答得好似有啲婉轉咁？」
　
「唔好講啲唔等洗嘢。我幫你買埋曱甴屋，唔該你，唔好再好似餵龜咁丟啲零食入去…」
　
「吓？點解啊？捉到好多喎！」
　
「惹蟻啊老人痴呆！」小豆用力搣我塊面。
　
唔～睇黎我都係敵唔過女朋友嘅細心。
等到去旅行佢唔識睇地圖我先有機會凌辱返佢…