知唔知咩叫白色情人節啊？
2月14日情人節就女向男告白。
3月14日男方就回禮啊？！
　
大錯特錯啦！
係畀女朋友多一個慶祝同收禮物嘅日子啊！哈哈！
頭先同女朋友小豆食晚飯時，見佢今日心情幾靚，我膽粗粗咁問佢。
　
「其實呢…點解女仔咁鍾意發脾氣？」
「乜好多女仔對你發脾氣咩？吓？！」
「點解妳可以好似打街霸咁，啲波啊昇龍拳啊話出就出嘅…」
　
OK SHE WIN I DEAD DEAD…
　
點解呢？
當我搭車返屋企嘅時候，就研究緊呢個問題。
我發現呢個真係女仔嘅天性黎…

我甚至覺得，以前打仗好應該推晒嘅女人去做士兵！
　
試諗吓，每次打仗之前，總係都要靠個軍官講一堆廢話去激勵士氣。
打到一半屍橫片野，啲士兵仲淆底逃走添。
　
女人就唔同喇，佢哋每個月都總有幾日，一見血就戰意高昂。
再加上，我未見過發脾氣MODE嘅女仔會有退縮嘅一刻。
男朋友大聲，個女仔就大聲十倍！
　　
至於點解女仔會特別鍾意向男朋友發脾氣呢？
呢個問題就要追溯到石器時代，嗰時男人負責出去狩獵。
女人就留喺山洞煮嘢食、縫衫、湊細路…
　
當個女人心情不佳，佢無可能向堆食物發脾氣。
又唔可以對住自己個仔發脾氣，只能夠一直谷住谷住。
等到個男人，拎住隻獵到嘅山貓返黎…
　
個女人就即時搵到發洩對象，向個男人連珠爆發。
「我今晚想食燒豬啊死佬！」
　
於是，個男人只好自己食咗隻死貓佢…
　
所以各位巴打一定聽過女朋友講：「我一見到你個樣我就眼火爆啊！」
　
唔洗再問點解喇，因為你嘅祖先嘅祖先，都係默默咁死咗隻死貓佢。
　
不過就算女朋友有十三億個理由發脾氣，
亦有唔同組合技可以KO你…
但係氹得返佢嘅人只得一個！
YOU！
　
－－－－－－－－－－－
最新出版：《無病你呻乜嘢吟》
（好多地方都賣晒，要訂）
ig：BlueGodZi
專頁：http://www.facebook.com/BlueGodZi