細個睇完陳奕迅套＜賤精先生＞之後，唯一帶得走嘅就喺「前方是絕路，希望在轉角」呢句說話。
我知我無咩資格叫你唔好做傻事，因為我未必經歷過你經歷緊嘅困難，所以或者你所遇到嘅事真喺會令你有種解決唔到，好想死嘅感覺，但喺我想同你講，我都經歷過一段人生低潮，我分享下比你聽，希望你會從中得到少少啟發。
中五畢業果年，分數比預期低，同熟悉嘅同學分道揚鑣之後去左讀IVE，自己傻仔，揀左科電腦讀，仲要插班讀二年級。
讀左幾個月已經好想轉科，轉去沙田讀攝影，但喺老豆同阿媽唔比，堅持話讀電腦會搵到錢，但喺我果陣時每日都好驚返學，因為我唔識上堂嘅野，對於當時嘅我嚟講，電腦程式好難（依家都難），老師成日抽問，教java個阿sir又惡，每日都喺靠同學幫忙先過到，功課又難做，成日要死痴住人叫人教，班上又無女仔自然識唔到女朋友，同學又住得遠，基本上放假都喺自己一個人過。
果陣時好痛苦，晚晚都喊，訓住覺喊，沖住涼喊，壓力好大，望住堆筆記都喺唔知做緊咩，但喺第二日就考試，唔明做緊咩都要背，入到去起碼執幾分都好。
每次等出成績就好驚，唔知點算好，加上果陣時讀果科已經停左收生，要重讀／留班就要過青衣同一班陌生人上堂，所以壓力更大，因為唔知會點分組，又唔知果到嘅人好唔好。
好彩嘅喺有一班同學陪住我過左三年，但喺IVE年代算喺人生嘅低潮期，果陣由七十幾KG升到一百一十KG，好肥好肥好肥（雖然依家都好肥sosad），成日就只喺識匿埋喺房咩都唔做，因為喺學校對電腦對到好厭，所以返屋企都只喺瞓喺床發呆，成日著住件拉鏈外套，然後拉到上頸，好似＜衰仔樂園＞果個橙色人咁，望住天花板，成日問自己究竟做緊咩，又會諗將來條路點行，每次一諗，就會萌生「好想死」嘅諗法。
我試過屋企無人，我發癲咁亂咁大叫，「好想死呀」，「好想死呀，「好想死呀」，
又對住塊鏡同自己講「你真喺好樣衰呀，我喺你自己都覺得你好討厭呀，垃圾，廢物」。
我有陣時會望住窗邊，諗緊如果要跳樓我要點做呢？拆窗框之後跳出去？
我會唔會太肥塞住左呢？我喺唔喺應該減肥先呢？跳樓果陣反正都死，不如做下實驗，打開成堆遮，之後捉實跳落去睇下會唔會減速？
每次失落唔開心都會想死，但次次都喺無做，不過可能我一早已經喺思想殺死左自己好多次，所以先可以比自己每次都重新嚟過，然就突然就會過左個難關。
「關關難過，關關過」
呢句野喺有次一支公喺機鋪打高達，過唔到關之後有個阿叔同我講嘅一句話。
我笑住問佢，「難過嘅關又可以點過？」
佢拎出硬幣同我講，「有人幫手咪過到囉。」
屌，忍唔住笑左出嚟，當時又好，打緊文嘅依家都好，諗返都忍唔住笑。
有陣時，一個人享受寂寞、痛苦、孤獨好似好有電影感，好爽，房裡面就得自己，無人會同自己搶做男主角，喜歡做邊套戲都可以，講邊句對白都無人阻止你，但喺你要記住，享受過後要識抽離，唔好浸淫喺呢種負面快感到。
死，談何容易呢？
呢個世界好多人唔想死，但偏偏就要死，你呢？
你點解要死呀？
如果佢真喺你父母，寧願你成績差少少，都想你健康快樂咁成長。
你有諗法可以同佢地講，唔好一味接受，佢地雖然喺你父母，但佢地講嘅未必一定啱，佢地成日話為你好，但喺如果你真喺覺得有hard feeling，就一定要講出嚟，知無？
其實呢個世界無一個特定嘅生活方法，搵少錢同多錢都喺咁生活，大家最後到嘅終點都喺一樣，所謂嘅成功都只喺世俗所定落嚟，你今日失敗，可能喺別人眼中喺好成功；你今日嘅成功，喺某人眼中仍可以喺失敗，好死架咋呢樣野。
世界好大，大到你想像唔到，如果你有輕生嘅念頭，不如試下去你未去過嘅地方，體驗一下其他野，或者你會發現原來自己所遇到嘅困難只喺好少事，尤其是你長大之後，回頭一望，你會發現果件事根本細到你都未必記得，記得都可能只喺笑下就算，因為未來有更多嘅事物等緊你呢。
唔好死啦，返嚟啦，我地等緊你呀傻瓜。
「前方是絕路，希望在轉角」，「關關難過，關關過」
記住呢兩句野，ｏｋ？
睇好你呀。
Facebook: https://www.facebook.com/iam800yearpromise
Tumblr : https://promiseof8.tumblr.com
Instagram : promiseof8
