無論係商場定係地鐵站，每次搭親電梯，不論上定落，我總會本能反應地企女朋友落一格。
原因好簡單，就係緊握住大無謂犧牲精神，唔想女朋友走光。
『要望就望我個屎忽啦你班死變態佬！嘩哈哈哈！』
　
而無乜危險意識嘅女朋友，對呢種高高在上嘅視角表示非常愜意。
成日摸我個頭，或者熊抱我個頭…
　
「哈哈，原來平時你望住我個視角係咁樣，好得意。」
「我平時無係咁拍妳個頭啊！」我平時只係鍾意捉住女朋友個頭黎聞，我覺得佢啲頭髮好香。
　
「唔好…成個人壓落黎…我條頸就黎90度屈曲…」
「唔得啊～萬一你望其他女仔裙底咁點算！」

「呃、呃…我唔會…」
　
正當我條頸被拗後，被逼仰望住個商場天花板，沉醉喺呢個奇妙嘅仰視角。
我瞄到隔離電梯有一對情侶，一高一低咁喺電梯度接吻，個男嘅好似就斷氣咁表情痛苦。
我覺悟到，每一段如膠似漆嘅愛情，大概都會有令人窒息嘅感覺。
　
電梯到達目的地，我同女朋友又回復返熟悉嘅高度差距。
但係…
「喂！妳仲唔落返黎？！我條頸斷啦！」女朋友雙手環抱住我條頸，懸吊喺半空。
「唔落啊！我係樹熊黎！你有冇見過樹熊落地行路吖？」老老實實，又真係未見過…
　
我只好咬緊牙關，將女朋友吊去下一條電梯。
行上電梯，我又再次望住個天花板…
大概每一段愛情，都需要一份堅持同執著吧？！
　
最後，我同女朋友上到朗豪坊頂樓。
就算無乜嘢行，每次去親朗豪坊都鍾意由頂樓行落黎。
大概只係為咗搭嗰條，長到頸都斷嘅電梯。
我亦明白到，朗豪坊嗰個識得郁嘅藍天白雲天幕。
原來係設計畀男朋友睇…
　
就快賣晒：《無病你呻乜嘢吟》
IG：BlueGodZi
專頁：http://www.facebook.com/BlueGodZi