是咁的，話說前排新出左隻新game，都幾紅，幾多人玩，不過佢有乜好玩，玩乜野並唔係重點，我想講既係另一個問題。

話說而家智能電話主要分開左兩個系統依樣野應該好多人都知，分別係IOS同Android，咁一開始隻Game就出左係IOS先，而Android就遲左一個月之後先出。

講返隻Game，佢同一般手機game一樣，課重金既人已經升左上天，無課金既人就係下層繼續打餐死，此外，因為佢係一隻PVP（玩家對玩家）既遊戲，所以競爭比較直接，差距亦都較為明顯，就算你夠聰明，都要D時間升下卡既LV先有能力同上層既人一戰。

然後過左一個月，就黎左一大批Android玩家，佢地既情況有D唔同，課金既人必須比更多既錢，先可以追到上層既玩家。而最大既問題係一班無課金既平民玩家。

前排食飯，聽到兩個玩依個遊戲既朋友傾計，A用緊IOS，而B就用緊Android，B不停叫救命，話打緊既人好難打，而A就恥笑話B打緊個級數既敵人其實唔難對付，只係B個人技術既問題。

我都有玩依隻GAME，所以知道個問題所在。其實B打極唔贏，唔係因為佢弱雞，而係因佢除左同一群同期既Android玩家競爭之外，重要同上個世代遺留落黎，一班高不成低不就既IOS玩家對抗。

咁A玩緊果時呢？佢唔需要面對上個世代既老屎忽，只要打贏同自己咁上下既對手就可以上位。佢根本就唔知遲起步既B面對緊乜野景況，所以先可以講得出：「我以前都唔係咁易打上去架，不過努力研究下戰略好快就升到上去，所以你而家上唔到位係你既問題！」依D風涼話。

然後又說起一些奇異的辛酸史：「我話你知啦，當年（明明就係一個月之前）我係你果級既時候，遇到D課長（課金課得多既人）真係喊三聲啊！」

B聽罷苦笑兩聲，A又覺得好像得到不錯的反應，繼續自吹自擂：「果時真係重激氣過你而家啊！隻隻野高我幾Lv，比你既話，你點打啊？」

最後還補上一句：「果陣無人好似我咁指點你架！咪要靠自己研究戰術囉！」

聽到依度，我就發覺一個問題：點解佢地D對白咁熟口面既？

無錯，依個社會既老屎忽經常都講緊差唔多意思既說話，最可悲既係，佢針對既唔係遊戲，而係人生。係社會依個平台入面既情況比起遊戲更惡劣，因為我唔係第二代玩家，而係第五，第六代，甚至更後……眼前既處境已經唔係『難玩』咁簡單。

不過幾難玩都好，總有一日我地都會去到而家果班老屎忽既年紀……如果唔留意下自己，話唔定有一日就會好似A仔咁，一個不留神既話就已經變左一乞人憎既老屎忽。

一個討厭老屎忽既人最後變成老屎忽，實在係何等諷刺既事呢……