第八日

「啊！終於玩完喇？成個人散哂。」Five伸展手腳、拉筋舒展，赫然發現身旁的Zero，開口問：「Zero？你喺度嘅，發生咩事，點解你成身血？」

「Five，歡迎你返嚟，恭喜你順利完成任務，贏咗隻game。」Zero強擠出笑容，續說：「不過我哋處理嗰條屍嘅事畀字母眾發現咗，佢哋報告咗畀組織知，Kami好嬲，就派字母眾處置我哋，結果……」

Zero嗚咽，眼淚自眼角不爭氣的流下來，Five看到此情況，大概也猜想到事態的發展，他也變得沉默起來，一邊替Zero包紮傷口，眼淚一邊奪框而出。

包紮過後，Zero首先開腔：「成件事同你無關，唔駛咁自責，係我哋成team人一齊決定㗎嘛，大家都預咗最差結局，唔好咁傷心。」

Five聽後，哭得更大聲，Zero沒有阻止，只是靜待他哭好哭滿。

「咁我哋而家點算？」Five用哭腔問。

「而家字母眾追殺緊我哋，我哋點都要著草，諗計點離開呢個島，我唔想大家嘅犧牲白費咗，畢竟大佬One佢哋拼埋條命保護我，就係想要我整返醒你，唔想你死得不明不白。佢哋一直覺得揾你代替係連累咗你，所以係隻game入面不停暗瓦底幫你，亦因為咁，字母眾先起疑，最後先揾到條屍，喺Kami面前告御狀。」Zero回答。

Five回想一連數天遊戲，的確有些事是很難解釋，特別是被狼群圍攻的一次，而現在，所有謎底也解開了，原來是得到Number Man的各位暗中幫助，亦因為如此，才令其他團員被殺，這樣一來，Five便更覺自責。

「我要幫大家報仇，我要殺哂佢哋，唔只係字母眾，而係要成個組織一齊陪葬！」Five雙眼充滿仇恨，立下了報仇宣言，準備衝出去。

Zero見狀，連忙制止他，並說：「你諗住點做？而家衝出去，赤手空拳同佢哋死過？冷靜啲唔好咁衝動先，講緊係對付一個有世界各國政府同財團暗裡撐腰嘅地下組織，成員過百，而且個個都心狠手辣、身經百戰，僱傭兵level，得我哋兩條友，乜gear都無，點玩？再講，就算full gear都唔夠玩喇！留得青山在，那怕冇柴燒。我哋甩咗身先，再重整旗鼓、從長計議。」

Five雖然報仇心切，但未喪失理智，他很清楚目前情況，亦都十分認同Zero的說法，但要逃出Island P談何容易，但待在此處，被發現也只是早晚的事，如何可以神不知鬼不覺的逃走？

「口殊，靜啲，好似有腳步聲。」Zero示意Five安靜，以免被發現。

「嗚……」聲音緩慢而平靜。

「啲聲好似怪怪哋嘅？」Five壓低聲線問。

「係囉，唔似係人，反而似係野獸。」Zero回話。

「唔通……」Five似乎有點頭緒。

「噠噠噠噠……」忽然，一陣雜亂的腳步聲由遠而至。

「嗚……」野獸的叫聲一秒間變成低沉且憤怒，像是警告著對方。

「仆街，有群狼，大家小心。」一把男聲說。

「佢哋好似唔係咁友善喎，我哋駛唔駛撤退先？」一把女聲問。

「唔駛理咁多，只係一群畜牲，無咩好驚，殺哂佢哋！」命令由一把雄壯的男聲發出。

接著數分鐘只聽見「嘭嘭嘭」的槍聲和「嗚嗚嗚」的悲鳴聲，到最後回歸平靜。

「你老味，嘥我字彈，呢度咩人都無，我哋走，去第二度揾。」雄壯的男聲說完，腳步聲便遠去。

Zero和Five待人聲遠去，認定是安全後，便從地下室走出來，然而他們很快便對此決定後悔了。

「屌，好撚核突，成地都係血，肉醬意粉咁，又臭，想嘔。」Zero說，但Five已經先將他的說話付諸行動，搶先在旁嘔吐。

「嗚……」微弱的悲鳴聲傳到他們的耳裡。

「小心，仲有啲未死。」Zero警戒著，而Five則擦乾淨嘴巴，往音源走去。

他東翻西找，終於在層層屍體下找到奄奄一息的狼小孩。

「喂，佢仲未死。」Five抱著他對Zero說。

「屌，咪鬼理佢喇，我哋自身難保，唔好自找麻煩，由得佢死喇。」Zero邊說邊找可用的武器。

「唔得，我唔可以見死不救，況且我覺得佢係善良嘅，對我都唔差，我想救返佢，佢一直畀狼養，無見過人類，好可憐。」Five對狼小孩流露出憐憫之情。

「唉，我唔知咁多，你鍾意喇，唔好拖累到我哋就得。」Zero說。

Five細心替狼小孩包紮好，然後再把他綁在背上，好讓手腳可以自由活動。

「我哋部直升機仲喺四號停機坪，我哋要喺呢度走過去，距離唔近，而且仲有好多人迎接我哋，唔係簡單任務。」Zero在地上畫了一個簡單地圖。

「嗚……」狼小孩醒了，掙扎著。

「喂，你受咗傷唔好亂咁郁。」Five說。

「嗚嗚……」狼小孩動作越來越大，Five只好放他下來。

「嗚嗚嗚……」狼小孩在地上時而轉圈，時而跳動，又咬Zero和Five的袖口及褲管。

「佢好似有嘢想講，但我哋唔明。」Five道。

「或者我大約估到。」Zero說：「Five，你話佢畀狼養大，一直都喺呢度？」

「係，我諗應該係。」Five答道。

「咁可能佢知啲秘道之類，我哋跟佢行喇。」Zero說。

Five也沒有其他策略，只好跟著狼小孩賭一把，所以同意了。

狼小孩帶著他們走出教堂後，往叢林走去，走著走著，便走到一地洞前，狼小孩示意讓他們跟著走進去，然後便帶頭率先鑽入去。

「頂，呢度好窄。」Zero抱怨。

「啲狼咁大隻都鑽到入嚟咩？」Five也插嘴。

地洞內錯縱複雜、四通八達，要不是有人帶領，恐怕進去後永遠也找不到出路。

在地洞內鑽了不知多久，大概兩個多小時吧，他們終於看到遠處有一線曙光。

「終於到出口喇。」Five感嘆。

「靜啲，廢事附近有人。」Zero謹慎的說。

狼小孩在洞口觀察一會後，示意Zero和Five出來，而出口正正是停機坪附近。

「好，我哋部直升機喺嗰度，暫時都唔見附近有人，我哋快手啲應該無問題。」Zero計劃著。

「我覺得唔係咁簡單，靜得太可怕，我驚有埋伏。」Five潑冷水說。

「咁……或者我哋去嗰面，可以睇得清楚啲。」Zero指著四號停機坪前一百米的草叢。

他們一行三人潛行到說好的草叢，發覺整個停機坪真的空無一人，於是他們便飛快的登機，準備起飛。

「Fire！」霎眼間，四方八面都有子彈射過來，幸好我們在防彈的直升機內，但面對猛烈的攻擊，恐怕也支持不了多久。

「快啲起飛！」Five說。

「唔好畀佢哋走，火箭炮準備。」Z說。

「仆街，快啲走，畀佢射中就gg。」Zero慌亂起來，直升機飛不起。

「冷靜啲，㩒嗰個掣，再拉。」Five指導著Zero。

「Fire！」火箭炮隨著Z的命令而發射。

「嘭！」的巨響，火光隨即升起，同時直升機也升起，不過是打轉的升起。

「啊……好暈呀！」Zero說。

「拉住個掣，慢慢穩住再升高。」Five說。

子彈不斷射中機身發出「乒乒乓乓」的聲音。

「快啲還拖，射尻佢哋。」Zero咆哮。

「射佢哋啲機，等佢哋無得追上嚟。」Five冷靜的說。

「好，講得啱，仆街喇你哋！」Zero說完，飛彈便立即發射，停機坪的所有直升機頓時爆炸。

「哈哈，拜拜你條尾喇撚樣！」Zero伸出中指大聲叫，不過島上的人根本聽不到他的聲音。

「Zero，我哋而家去邊？」Five問。

「我都唔知，不過天大地大，總有我哋容身嘅地方，我都好想報仇，但憑我哋而家嘅實力，可以話係痴人說夢，所以要揾舊錢再招兵買馬先。」Zero說。

「我哋個竇都無得再返去嘅喇，揾個新竇喇，我有個心水好地方。狼小孩，你以後就跟住我哋生活，就叫你做Nine喇。」Five說。

直升機消失在水平線，一直飛到未知的遠方。