《我係其中一個便衣衫加黑背心人》
我望望自己，混喺一班著制服嘅黑社會當中，心諗：點解我會喺度？
呢班俾大眾稱為狗嘅黑社會，今日因為唔夠人手做嘢，俾錢四圍請Part time。本來我身為義和幫，一直同呢班狗幫為敵，會無啦啦加入，主要係因為啊強。
「屌你老母，你唔撚係唔嚟呀嘛！」前一晚俾啊強喺電話大聲喝斥。係呀，啊強好爛口。
喺義和幫嚟講，我簡直係斯文書生一名，雖然我同啊強已經係四十幾歲嘅中佬了。
我驚訝問：「為咗嗰千幾蚊去幫班狗？！唔使預我！」
「屌你老母！」啊強好似慣咗講每句嘢之前都要問候下林鄭，「用下個腦啦仆街！係華哥吹雞呀，一定要嚟呀你。」
華哥算係我哋上司啦，而喺佢上面仲有好多個大佬，義和幫就係咁樣一層一層運作，同朝9晚6寫字樓工無異，亦同班狗無異。
於是乎，第二日我同啊強著住便服加黑色背心，企喺班著制服嘅狗後面，形成大概有20人左右嘅小Team，當中仲有好多黑背心人，睇個樣都係Part time嚟。
制服狗派咗支筆同薄俾我、派咗部攝影機俾啊強，好亢奮咁話：「嗱，等陣叫你哋做嘢嗰陣，就抄晒班學生身份證，影晒佢哋相呀，明唔明呀？」
「屌你老母，」啊強改唔到口頭禪，不過語氣係溫和咗嘅，佢對制服狗話：「部機咁撚新款，我唔撚識用呀。」
制服狗對佢嘅爛口見怪不怪，或者因為佢哋本身都係咁啦。制服狗求其教啊強禁某幾個制，就唔耐煩咁推我哋走，趕住派唔同任務畀唔同人。
以我從小就識啊強咁多年老友嚟講，我肯定佢識用部機。我好奇地望住佢，正想問佢究竟想點嗰陣，佢向我打個眼色。
我即刻明佢意思，問制服狗：「喂啊蛇，我唔識字㗎，點樣抄冧巴同人名呀？」
制服狗上下打量我，好明顯覺得我粗人一個，唔識字好正常，正諗緊點處理嗰陣，佢上司宣布：「你哋呢Team出發喇！」
OK，咁樣是是但但，我哋就出發喇。臨行前班狗萬般叮囑我哋幾個背心人：「等陣無論咩人問你哋拎證嚟睇，都唔使理佢哋，乜都唔好答就得！」
到達目的地，成班制服狗齊晒裝備，圍住又瘦又乾嘅學生，有狗大聲喝：「過嚟記錄佢哋身份！」即係嗌我同啊強做嘢啦。
唔知係曬定太熱，啊強塊面紅晒咁衝過去，個樣好嬲咁。我開始擔心佢出手打班學生，即刻跟埋過去。
現場有5個學生，而且我哋就2X人，今次你哋5個死梗喇......
班狗開始續一搜學生袋，話懷疑佢哋有份衝撃喎。我心諗，佢哋咁做都係你哋逼出嚟咋喎！
啊強好粗魯拉咗個學生妹去埋邊，叫埋我過去睇實，我捉住啊強隻手，提醒佢：「喂，輕手啲啦。」
「攞身份證出嚟！」啊強無視我，大大聲喝學生妹，班狗聽到就唔再擔心我哋呢邊，望去其他 Part time度。
睇得出學生妹驚到成身震晒，但佢雙眼依然好堅定咁望住我哋，拎咗張身份證出嚟。
啊強開著部機，準備影去學生妹之前，我忍唔住伸手想幫學生妹擋，心諗，喂我哋兩個中佬加埋都做得佢爺爺呀，咁樣恰一個小妹妹我真係做唔出。
殊不知，啊強竟然影嚟影去，都無對住學生妹或佢張證，係咁將鏡頭晃嚟晃去，最後仲熄埋機。
啊強細細聲同學生妹講：「老老實實，你身上面有危險品嘅話就拿拿臨塞俾我，佢哋搜唔到啲乜就會放走你。」
我即刻好愕然，並唔係因為啊強無用「屌你老母」做開場白， 而係因為佢轉軚唔幫班狗而幫學生。
對下一個學生，啊強一樣都咁做，佢仲喺人哋面前解釋：「班狗以為人多可以充撐場面，但反而咁樣有內鬼都唔知。」
「你唔係轉軚，而係一開始就想幫學生！」我好詫異咁講：「華哥根本無叫我哋嚟，係你自己想嚟！」
「屌你老母，」佢聳聳肩，笑一笑，「如果唔咁撚樣，點呃到你嚟呀。」
生平第一次覺得呢句「屌你老母」好動聽。
啊強個笑容，令我諗起細細個嗰陣，因為中學老師不理不聞，啊強捉我一齊去幫同學教訓某個欺凌者，完事後嗰個笑容，正係同依家一樣。
即使過咗咁多年，經歷唔同事，佢依然係嗰個有良知、企喺正義嗰邊嘅爛口強。
===完===
純粹FF，雖然班狗無編號，
但邊有易做內鬼......
套用村上春樹一句：「在高大堅硬的牆和雞蛋之間，無論高牆是多麼正確，雞蛋是多麼錯誤，我永遠站在雞蛋那邊。」
👇facebook: 橘子綠茶👇
https://www.facebook.com/greenizmstory/
👇ig: greenizmstory👇
https://www.instagram.com/greenizmstory/
#反送中 #無間道的可能性 #香港人幫香港人
#橘子綠茶
