【一套戲開咗場，要留到最尾睇埋結局先】
「我決定咗⋯⋯自殺⋯⋯」允兒喺 ig打咗呢句之後，即刻有好多人留言又 direct msg，勸佢唔好。
允兒呢個 public ig本身用嚟講反送中嘅事，識咗一班人。後來氣氛愈嚟愈消沉，終於有一日，有人捱唔住。
允兒萬念俱灰，企喺高樓天台邊緣。望落下面繁華夜市，加上落緊好大雨，允兒覺得好寂寞、好絕望、好凍。
佢點會唔知咁樣係唔值得？只係，其他人唔可以完全了解自己、根本無資格評論自己。所以佢哋一切嘅留言，允兒唔同意，亦聽唔入腦。
「等等！」正想熄機嗰刻，允兒收到個 direct msg，令佢停手：「嗱嗱嗱，我唔係叫你唔好，反而好支持你㖭。無論你有咩決定都好，睇埋我講乜先， OK？」
「OK。」允兒 Send完，抬頭望望雨夜。心諗，對方個名係「黃雨衣」，究竟係咩人嚟？
「老實講，我都有同樣嘅念頭⋯⋯你介唔介意實行嗰陣，多個人一齊？」黃雨衣問。
允兒望一望樓下，要喺咁高跳落去，有個人壯壯膽都好。佢打：「我依家喺XX大廈天台。」
「收到，我喺附近好快到，等埋我。」黃雨衣 Send咗呢句之後，允兒見到佢「輸入中⋯⋯」。
允兒拎住冷冰冰嘅手機，雖然單憑文字訊息睇唔到表情、亦聽唔出聲，但唔知點解「輸入中」呢三個字有種莫名嘅溫暖感。
唔得，允兒擰擰頭，即刻打：「咪先，你唔會嚟到就即刻拉走我呀嘛？」
見到黃雨衣嘅「輸入中」停一停，然後又繼續輸入中，再 Send出：「保證唔會，而且你做嘅話我會即刻跟。等埋我先呀，我一個人無咁大勇氣⋯⋯」
「OK。」允兒打。佢望望手錶，時間夜晚八點五十八分。為咗唔好惹嚟樓下有人見到報警，允兒喺天台邊緣退返入去，求其坐喺地上面，任由大雨淋濕。手機係防水所以唔驚會失聯，不過已經唔緊要了。
「講開勇氣，」黃雨衣 Send出，「你有無啲一直好想、但又未夠勇氣去做嘅事？其實我喺決定要跟你之前，考慮咗好耐，仲有好多嘢想做又唔敢做⋯⋯」
允兒乜都唔想諗，淨係有一件事想即刻做。佢打：「無喇⋯⋯香港無晒前途⋯⋯無晒希望⋯⋯我乜都唔想做喇⋯⋯」
「我到樓下喇，依家上緊嚟。」黃雨衣 Send出。
會唔會快得太誇張呀？定係佢根本唔係嚟緊呢——允兒正諗緊，黃雨衣又再 Send msg。
內容係：「無錯！反正咁絕望，我哋今晚過後再無將來，不如做獲勁嘢先？例如扯旗禮嗰陣燒 9佢旗、落晒佢面，又或者去搞掂個賊婆，整亂晒佢哋陣腳都好呀！」
呢段 msg令允兒破涕而笑，咩叫做獲勁嘢呀。佢搖搖頭，無奈咁打：「有用咩？」
「唔一定有用，不過喺我哋終結之前，至少起少少作用先。」黃雨衣打，「仲有仲有，你話我哋最強係乜嘢？」
「？」
「就係唔怕死！」黃雨衣 Send咗個笑喊 emoji，「諗緊好唔好等到下次再有衝擊嗰陣，擋喺班學生面前做人肉護牆。反正我哋點樣重傷、點樣整親都唔驚啦，嚇 L死班狗都好呀。」
呢個提議好似有少少道理，允兒諗唔到點覆。
黃雨衣又再 Send出：「你戶口有幾多錢？」
話題轉得咁突然，允兒即刻諗：唔通係詐騙？允兒打：「做乜咁問？」
「諗諗下，我戶口有萬幾蚊，成世人都未食過好嘢。不如喺今晚結束之前，我哋好好食一餐貴嘢先？」
允兒今年廿幾歲，唔好話食好西，連一個名牌手袋都未買過。黃雨衣咁樣一提，其實又真係好多嘢未做過、未食過、未買過。
不過⋯⋯咁又點？佢 Send俾黃雨衣：「算啦⋯⋯我都係——」允兒打到一半，又彈出黃雨衣嘅msg，打斷咗佢。
「最重要嘅係，」黃雨衣話：「就好似一套戲開咗場，要留到最尾睇埋結局先。嗰班人係一定有報應㗎，我想睇埋佢哋點樣慘死先。」
忽然大風一吹，有件黃色雨衣吹過嚟，啱啱好飛落允兒身上，好似想幫佢擋雨咁。
廉價嘅黃色塑膠雨衣，輕輕的、脆弱的，但佢嘅力量卻係無價。
時間晚上九點十五分。
===完===
想搵人傾下偈：
香港撒瑪利亞防止自殺會熱線：2389 2222
醫院管理局精神健康專線：2466 7350
撒瑪利亞會熱線︰2896 0000
社會福利署熱線︰2343 2255
生命熱線：2382 0000
賽馬會青少年情緒健康網上支援平台-「Open噏」24小時網上輔導：9101 2012（SMS）
學友社學生熱線：2503 3399
