〈夢想。現實。〉

從小至今,我都相信「做人如果冇夢想,同條鹹魚有咩分別」。星爺喺《少林足球》講過呢句說話,帶領潮流,自此夢想就成為咗年輕人必備嘅信念,亦係眾人嘅口頭禪。

「有夢想,生活先有意義」、「夢想係進步嘅動力」、「有夢想就可以成功」、「勿忘初心」……呢啲說話耳熟能詳啦!夢想似乎變成為咗年青、熱血嘅代名詞,亦係大部分人趨之若鶩嘅事。

追求夢想並無唔妥,但極端嘅思想和蔚然成風嘅潮流就令我擔心。

人點解要有夢想?呢個牽涉到各人嘅人生觀。人生唔只得夢想呢個部分。有人認為夢想重要,亦有人為家庭放棄夢想,當中並無對錯,只係單一嘅追求同信念顯然係對人生嘅限制。將夢想極端噉睇成人生唯一嘅追求,過度吹捧夢想嘅重要性,會阻礙個體體驗人生嘅多元。

過度鼓吹夢想,甚至為咗夢想放棄一切嘅思想,係十分危險嘅事,尤其係年輕人。我當初抱住一腔熱誠寫作,好似盲頭烏蠅咁只顧不停寫,心諗只要努力同有熱情就一定可以達成夢想。但喺過程當中先發現自己嘅想法太過狹隘。

閱歷少、心志大,往往踏上追求路先體會到各種困難。生計、人生規劃、心理矛盾、技巧才能……我只睇見眼前嘅嘢,只知道自己嘅熱情,但往後嘅困難和挑戰遠比想像中多。

盲目噉鼓吹追夢嘅風氣,豈不是將人推到賭桌上?尤其係媒體嘅鼓動都係情緒化嘅、係理想化嘅、係正面嘅,稍為欠缺自制能力嘅人都會瞓身落去。更重要嘅係,冇人可以保證一定成功。

我算係唔合格嘅「追夢人」。追求夢想係唔理智嘅,呢點有所追求嘅人都清楚。一旦愛上某種東西,就會自然而然噉去做,廢寐忘餐,唔知時日。

呢種心流嘅狀態係絕美嘅事。極度嘅專注力和集中力使人忽略咗身邊一切事物,同時身心合而為一並完美噉配合,彷彿所有事都喺不假思索嘅情況下進行,身體就靈巧噉活動起嚟。一旦積極噉投入其中就唔能夠自拔。

而家嘅我諗,或者我並唔係喺追求結果,只係享受追夢嘅過程。就好似賭錢一樣,贏嘅時候會意氣風發,賭得更大;輸嘅時候為自己搵藉口,相信下一次一定會贏。

呢種無止境嘅追求係幾咁愚蠢!輸嘅時候幻想住下一次會贏。輸得愈多,期望就愈大;期望愈大,就愈沉迷。那怕文章只係多一次觀看次數,或多一次讚好,我都將它無限放大,以補償乾癟嘅自信心。

呵呵!原來我只係想享受多巴胺引起嘅快感和刺激。我將自己放到極端處境,破釜沉舟,然後享受不確定性帶嚟嘅期望同刺激感。成功與否並非重點,甚至愈係失敗,期望就愈大,幻想成功嘅快感就愈係強烈!

幾咁可笑!我將自己好似彈簧一樣不斷壓縮,搞得身心俱疲,就係為咗放手反彈嘅一瞬間,一嗚驚人。但係而家一事無成嘅我仲係卑劣得無可救藥。

閑時見到有人鼓吹或吹捧夢想,心入面總有啲厭惡。雖然自知無法坦然,但都係以平常心看待比較好。