上集：https://post.shikoto.com/posts/143362-我全家都係機械人（上）

我開門第一句就講：「阿媽，唱隻歌黎聽下。」
「一起森巴舞，撥走不滿，發洩發洩你苦悶......」阿媽開口高歌。
我嚇到起雞皮：「得得得，停低。」
「主人，您滿意嗎？」阿媽微笑。
珠珠見狀，行過黎，拆開我阿媽嘅後腦，露出一堆機械零件：「主人，您依加信啦？」
我哭笑不得：「我明白，我全家都係機械人，連隻狗都係。」
「唔止全家，係呢個世界所有人同動物。」珠珠指住一隻路過嘅蟑螂：「包括佢。」
然後隻蟑螂都唱：「主人，一起森巴舞，撥走不滿！」

我忍唔住問：「咁我岩岩見到果啲狗血，平時果啲昆蟲屍體......」
「都屬於『生活模式』嘅遊戲設定，進入『真相模式』，就完全由您指揮。」

我用咗幾日時間，再出街試咗無數次，先接受到，我係呢個世界嘅主人。
咁我當然唔使再番工，因為我一聲令下，老闆就畀晒啲錢我。
但我都唔需要錢，因為所有野都係免費。
我可以食最貴嘅野、坐最靚嘅車，甚至唔使買樓。
我只需要行入豪宅，叫啲住客出去，就可以住落去，日日換屋都得。
我嘅人生，好似開咗外掛。

行街見到靚女，可以叫佢除晒衫，但我已經好少咁做。
因為頭果幾日，我叫晒全城嘅索女明星，陪我酒池肉林咁玩。

玩咗幾日，就開始悶。
原來你見到一個靚女，半遮半掩，你會好有幻想，但一百個靚女日日唔著衫呢？
我感覺好似係，打機用外掛，輕而易舉，得到所有裝備同寶物，
但好快，隻game就唔再好玩。

結果，我搵番珠珠，叫佢幫我轉番「生活模式」。
我寧願煩惱畀唔起首期，幻想下女明星，好過人生無晒追求。
「您需唔需要保留『真相模式』嘅記憶？咁你隨時可以轉番『真相模式』。」
「唔保留。」如果有呢段記憶，我辛辛苦苦生活，一定忍唔住開番外掛，覺得平時嘅努力無晒意義。
珠珠點頭：「明白，依加幫主人清除記憶。」

我知道醒番之後，珠珠會變番野蠻女友，我會繼續唔夠錢使。
可能，人生嘅美好，就係在於有缺陷。

－完－