我係一個好普通嘅年青人,出街無乜人留意,
份糧月月清,煩惱畀唔起首期,希望中六合彩頭獎。
女朋友唔係好靚,但都有感情,雖然間唔中嘈交,我都知我最後會娶佢,吵吵鬧鬧咪一世。
不過,有時我都幻想下,如果某索女明星係我女友就好。
諗下啫,唔算過份掛?我唔信你無幻想過。

直到有一晚,女友珠珠又同我嘈交。
唔記得嘈乜野啦,我地一齊放完狗,喺門口果條走廊度行緊。
珠珠發脾氣果陣,習慣掟野,都掟爛過幾部電話。
而果一刻,佢咁岩攬住我隻狗,下意識一掟,隻狗就呈拋物線地飛咗出街。
我呆咗,真係筆墨都無法形容我嘅心情。

我用最快嘅速度,跑樓梯衝落去,珠珠跟喺我後面。
但已經太遲啦,樓下一片血肉模糊,仲有堆人遠遠圍觀,指指點點。

我望住珠珠,我相信我對眼噴緊火,灼熱到可以燒死佢。
珠珠從來無見過我咁嬲,嚇到震晒:「我......我幫你整番好佢,唔好嬲啦。」
整番好?妳以為係電子狗?
點知珠珠執起條狗屍,唔知從邊度拎兩粒螺絲出黎,撳番落去。
隻狗活生生咁跳起,跑向我吠咗兩聲。
佢復活,我應該開心,但係我養咗十年嘅愛犬,係一隻電子狗?
我晚晚帶佢出街大小二便,但佢係一隻電子狗?
最大嘅問題係,珠珠知佢係一隻電子狗,而且仲識整電子狗,但唔話我知?

好快,我發現上述嘅問題,都唔成問題。

因為更大嘅問題係,圍觀嘅途人一啲都唔驚訝,好似有隻電子狗跳樓,仲栩栩如生到呢個地步,係一件好正常嘅事。
珠珠睇出我嘅疑惑,好抱歉咁鞠個躬:「主人,由於我暴露咗祕密,遊戲由『生活模式』轉做『真相模式』。」
「乜遊戲?」女友玩我online?
「您係25世紀嘅人,呢個係『人生遊戲』,為每個玩家專門設計一個世界,畀您體驗21世紀嘅生活。為咗提升遊戲體驗,進入遊戲果陣,暫時消除您地嘅記憶。」
嘩,珠珠吹到咁大?佢係咪想求婚?
「每個人嘅性格都經過設定,例如我係野蠻女友。但如果你發現咗我地係機械人,所有性格設定都會消失,您可以主宰任何人同動物。」

「妳嘅意思係,妳會聽晒我話?」珠珠想玩女僕模式?
珠珠微笑:「唔止我,所有人都會聽從主人嘅命令。」
我指住果班途人:「OK,咁我叫佢地除衫......」
突然間,所有人都開始除衫,十秒後,全街都係裸男裸女。
我開始有少少接受唔到,我衝上樓搵我阿媽,佢一定唔會玩我。

下集:https://post.shikoto.com/posts/143885-我全家都係機械人(下)