.jpg "男友自殺，入我數？（上）")
「凌晨發生男學生墮樓事件，死者為荔枝春中學中四學生。
這是本月第5宗學生自殺悲劇，各界呼籲政府關注學業壓力問題......」
呢單係三日前嘅新聞，但依加我依然震撼，因為果個係我初戀，阿澤。
嚴格黎講，應該係前度男友，我地半個月前已經分咗手，但始終係同班同學，朝見口晚見面，突然間無咗。
番到學校，大家都議論紛紛，
突然有個女仔問：「聽講阿澤無留低遺書，珊珊，妳估佢係咪俾你飛咗，太大打擊所以自殺？」
我嚇咗一跳：「點會啊，我地......和平分手，同埋都過咗半個月。」
「唔係啵，我聽講好多人分手，都唔會即日自殺。」
「嘩，咁講法，珊珊妳真係魅力沒法擋......」
我知道「為情自殺」，係有故仔過「學業壓力」好多，但明明唔關事，我當然唔會食死貓。
但一推開班八婆，我就見到校長經過，意味深長咁望咗我一眼。
過多兩堂，我俾老師叫咗去社工室，
社工無講啲乜野，就係開導我，叫我節哀順變之類嘅廢話。
「由於某啲不幸事件，令我地意識到，學生感情健康嘅重要性。
中學生嘅身心尚未成熟，我地一向唔鼓勵你地談戀愛，但亦知道部份同學已經開始拍拖。
為咗保障同學嘅身心健康，我地會聯絡家長，逐一輔導有拍拖嘅同學......」
不幸事件、感情健康？將阿澤嘅死推落我頭上？點解要咁做？
呢個問題，喺校長開記者會果日，得到解答：
「經過調查小組嘅研究，不幸事件並唔係因為學業壓力發生，
荔枝春中學功課、考試上都有合理安排，務求令學生全面發展......」
學業壓力，學校孭鑊；感情問題，只係一個無關重要嘅女學生孭鑊。
一年考十次試都叫合理安排？咁荒謬都有人信？
但係，「戀愛輔導計劃」推行後，好多校園情侶被拆散，
於是我行到邊，都聽到人單單打打：「唉，點解老師要阻人拍拖，我又唔係某啲人，會拍拖拍到累死條仔。」、「咪就係有啲人累人累物。」
仲有人上名校Secrets開Post，話見到阿澤俾我飛咗之後，有幾傷心，好後悔無勸佢睇開啲......
一時之間，喺網上傳得沸沸揚揚，有人撐我、有人鬧我。
校長親自叫我刪Post，我斷然拒絕，寧願俾人踢出校，都唔會食呢隻死貓。
結果，我無俾人踢出校，但發生咗更恐怖嘅事。
校規有寫明唔准帶電話，但人人都帶，小息拎出黎玩，老師通常睜一隻眼閉一隻眼。
某一個小息，突然有兩個訓導衝入班室，沒收我電話。
第二日，我阿媽黎學校，先拎得番部電話。
奇怪嘅係，我個Post無刪到，fb所有野都無變，似乎學校只係公事公辦。
係我太天真，幾日後，一段whatsapp記錄喺網上流傳。
係我同Daniel嘅曖昧whatsapp，時間係......同阿澤分手之前。
無錯，我一直都無講，我係同Daniel曖昧，但我同阿澤，真係和平分手架，而且阿澤分手後，都無乜糾纏。
網上啲人唔會咁諗，佢地話我畀綠帽阿澤戴，害死阿澤。
我知我有錯，但......有咁嚴重咩？你唔可以因為我亂拋垃圾，就覺得我殺咗人！
我偷偷搵Daniel商量，喺阿澤死後，我同佢已經無聯絡。
「啲人唔止怪我，都話你溝人女朋友，累死阿澤，所以我地係同一陣線。」我好誠懇咁問Daniel：「你有無咩好辦法？」
Daniel支吾以對，話佢要考慮下。
