鬼叫我炒散 #2 「唔好彩先要見工?」

有冇人面試親都衰架?係嘅話,炒散界就歡迎你喇。事關散工長期唔夠人,基本上你有眼耳口鼻就返得工。

例如酒店炒散,落街同銀行職員講,想申請張飲食界強姦金卡,對啲好似我咁內向嘅人嚟講,喺最最最最最難嘅一步。之後喺Facebook搜尋「兼職」、「炒散」,或者下載炒散app,再唔係返工唔好太自閉,識返一、兩個全職炒散嘅同事,得閒問下佢哋有咩工,隨時多到你唔想返。

如果係跟agent,就要先填下表,自我介紹幾句,填完一次,永久保用,唔駛份份散工再填。

我試過同朋友一齊申請份agent散工,朋友好緊張咁問我會點面試。我好淡定咁同佢講:「頭先agent打嚟,講完份工要做咩,就叫我等佢排更表返工,一分鐘就in完咗喇。」跳起,Yeah!

連面試都唔駛嘅工,你就知道某啲行業係幾缺人,而質素有幾參差喇。有啲炒散係零training直接開工添,有時唔專業都冇符。

所以唔少人包括我,俾人鬧嗰時,都會答:「吓?我Temp嚟架咋!」

忽然諗起《一念無明》嘅金句:「唔係咩都可以外判比人。」

其實而家啲公司請唔夠人就旨意曬外判,變相用更劣嘅待遇請全職,打工仔梗係唔會同份19工過人世啦。咁樣公司更難請到全職,更加要靠炒散吊命,真係惡性循環。

點解唔自己提供好啲嘅員工福利,挽留人才呢?真係嫌HR冇嘢做,又鍾意俾agent食水咁款。

我聽過有啲倉,腦細唔肯出多啲錢,捽之做唔曬啲嘢,日日要靠agent臨時拉夫,埋單計數仲貴過自己出錢請個全職兩、三百蚊一日添。

咁搞法,班全職梗係唔鋸啦,明明大家做同樣嘅嘢,全職要求仲高啲,點知人工隨時低過嗰班聽日唔知仲見唔見到嘅炒散。

講講下好似講到炒散係萬惡咁,唔關我哋事架,怪就怪你腦細,同香港地縮骨嘅風氣喇。

最可悲係,正苦有份帶起呢種風氣。睇新聞見過清潔工人都係外判工,佢哋唔係炒散,仆心仆命做嘢,偏偏連最基本嘅福利都冇,仲要隨時面臨失業危機,真係好心酸……

唔知係離題定呢樣先係正題……講返見工,有次返份幾筍嘅promoter工,個個都大讚好hea,點知其中一個同事竟然話,份工最煩係要去到冇雷公咁遠嘅地方見工。

我哋成班當堂大笑,佢仲話要兩文三語面試,同測試打字速度添。唔係掛,要求突然高咗,唔通人工高啲?又唔係喎!咁除咗唔好彩,我都唔知同佢講咩好喇。

鍾意嘅,請Like & Share!Follow埋專頁,睇文快一截!
短篇狂想、鬼叫我炒散、短文系列:https://goo.gl/QcXrPe
專頁:https://goo.gl/FVN3Pb

#余該隱 #鬼叫我炒散 #炒散 #見工 #外判 #全職 #agent #員工福利 #奴隸獸