最近有位美麗人妻向本皇哭訴（咪心邪，單純傾計咋）
美麗人妻叫Angel，人如其名真係幾索，長金髮，大眼直鼻，細小嘅嘴唇加埋白裡透紅嘅皮膚，而且打扮入時，絕對睇唔出佢係已經有２個仔囡嘅媽媽。
而且今年只係24歲，行出街真係迷死唔少男人。

不過Angel早兩個月已經離婚，同前夫分埋居。
由一位住私樓，出入都有老公車嘅少奶奶，變到去深水埗自己租劏房住；平時做慣老闆娘，依家就要去做美容Sales跑數去。

見佢堅強生活，本皇都感覺呢個女人相當有毅力，表示支持但早排收到佢信息，原本呢個只係我一廂情願諗法。

【又話養我】
讀書唔成，落吧去蒲係慣性動作，就係咁識咗位土豪前夫。佢話自己當日嫁個陣，個個都羨慕佢搵到個「荀盤」

從此諗住可以做老闆娘日日嘆世界，就連小朋友都生兩個。幸福美滿生活就由大半年前「荀盤」開始嫌棄呢位Angel。

話明「荀盤」土豪，身邊自然多女埋身，當中少不免比Angel更索更後生。
事情發展到咁，唯有離開。
不過無恥嘅人做得一單，都唔怕做埋第二單，錢唔比，仔囡唔比，一腳踢走埋Angel。

【自生更新】
佢搵本皇訴苦其中一個原因，就係想我幫佢搵下工，一問之下Angel除左化妝扮靚去玩去蒲之外，真係乜生存技能都無。
（但我肯定佢溝仔技巧唔錯，我感受到！哈哈哈哈哈哈）

「我唔企得架，企太隻會抽筋。」

「我啲英文唔好架，我去唔到灣仔個啲地方做嘢。」
「咁我唔識用電腦架嘛。」
「吓，咁低人工。」
「你咁叻，識咁多人，一定可以幫我搵到架可」

我差啲爆出口：「你出去搵多個有錢佬咪唔使煩囉。」

【愛情資產】
好多人以為搵到個有錢伴侶就可以生活安樂，但他朝有日唔再愛你，你點照顧自己先係問題。
Angel係個極端例子，我唔否定當日佢地兩個係咪真心相愛，但我只可以講做人要學識獨立照顧自己，女人更加需要。