上集：https://post.shikoto.com/posts/135010

外在美唔係咁得，就要令人留意我嘅內在美。
當有人知道，我用緊魚嘅身軀，但有人類嘅知識，拎去研究又好表演又好，一定唔會食我。
點樣令人留意呢？我又講唔到人話。
如果我跳隻舞，分分鐘俾酒樓以為我有病，扔咗我。
我望住透明嘅魚缸，突然昇起一個念頭：寫字！

一條魚寫唔到字，但我地呢度成缸魚，用身軀砌字，係絕對可行嘅。
砌咩字呢？筆劃太多砌唔到；筆劃少到「十」字咁，又會令人以為係巧合，
仲要表達我地嘅理想，夠吸睛，引起客人嘅關注......
我諗到「自由」！

好彩班魚信我，大家都想生存落去，就聽我話乖乖排位。

好快，我感受到人類留意緊我地！
隱約有人影圍埋個魚缸前面，仲有閃光燈影相。
受到關注，我地應該唔會輕易被製成盤中餐啦掛。

我地堅持住「自由」嘅排陣，唔知過咗幾耐，魚缸前嘅人影漸漸散去，只剩低幾個酒樓職員。
我諗係間酒樓夠鐘關門，呢個時候，部長將我地逐條撈起。
我好興奮，睇黎佢地意識到我地嘅特別之處，要好好養起我地。
點知，我被重重撻落冰冷嘅玷板。

我聽到個阿嬸話：「作死囉，今日高官擺酒，佢地居然砌『自由』。記者問我地老闆係咪對政府不滿，所以特登訓練啲魚砌字啊！」
另一個阿嬸答：「魚邊度訓練到架，啲魚自己唔知發咩神經。」
「我都係咁諗，但啲記者肯定有野寫啦，話天降異象都得啊。」

「唉，今次我地酒樓肯定出事，經理叫我地處理好啲魚。」
「咁樣一搞，話唔定我地飯碗都不保，啲衰魚真係要千刀萬劏。」

無辯解嘅空間，刀刃狠狠插入我嘅身體，劇痛，我下意識扭一扭，然後係下一刀、再一刀......
喺凌遲嘅過程中，我不斷諗，我做錯咗乜野？唔應該砌字？砌錯字？
係咪我唔砌「自由」砌「HELP」會好啲？
但係就算我砌另一個字，或者直情諗另一個辦法，結果......會唔會都係一樣？

原來，乜野「上帝關咗你道門，一定會幫你開番一扇窗」係呃人嘅。
咁努力有咩用？就係令你死果一刻，唔使後悔「早知我應該點點點」，而係意識到人生嘅真理：
上帝關咗你道門之後，通常會順手將你嘅窗、煙囪、門縫都塞實晒，
嗯，仲會連冷氣都壞埋。

－完－