一覺醒來，如果你發現自己變咗一條魚，你會點做？
變魚都唔係最大問題，係我透過魚缸望出去，隱隱約約見到一間酒樓嘅擺設，圓桌白布、著西裝嘅部長......
雖然我成日話想「像魚兒一樣自由自在」，但我無諗過，係酒樓魚缸果條等緊俾人劏嘅魚嘛。
情況就好似你話想做小鳥，結果變咗乳鴿。
我喊「救命」，但無人理我，反而魚缸入面嘅其他魚望住我：「咩事啊？」
OK，我係一條魚，有同魚溝通嘅能力，生理結構所限，自然無辦法再講人話。
即係話，眼前呢一班魚，就係我逃出生天嘅伙伴，我要相信，團結就是力量！
我即刻問佢地，有咩逃生計劃。
我解釋咗好耐：「你地有無見過，有啲同伴會突然俾人撈走？」
「有，佢地唔係搬家咩？」
我將食用魚、酒樓魚缸嘅概念講得一清二楚，班魚都係覺得我危言聳聽。
我都明嘅，如果你平平靜靜咁生活，突然有個人話畀你知，其實你命中注定會被分屍再煮黎食，你都唔信啦。
我諗到個辦法，我講咗個預言：「一陣有人行埋黎，游黎游去果條，會最先『搬家』；伏喺下面嘅，一定唔會『搬家』。」
啲客人揀魚，肯定揀最生猛果條先。
班魚唔信我，但無幾耐，真係有部長黎撈魚，我故意伏喺魚缸底，扮到半死不活，睇住最活躍果條被撈走。
「你點解會知架？」「你好叻啊！」「我要封你做偶像。」
我點答好？唔通我講，我以前都係企喺出面，思考食你地邊條嘅。
好明顯唔得，所以我轉向一個更重要嘅話題：「當務之急，係諗點樣逃生。」
講完之後，我自己都有啲頭痛，如果我係雞係鴨，都可以諗點樣偷偷走出去。
但依加我係一條魚，就算我奮力一躍，跳出魚缸，都只會缺水而死。
魚有咩好出路？回歸大海自由自在，但我一來未搞清楚我係咸水魚定淡水魚，二來酒樓都無可能放生我。
仲有一條路，係俾人養，養到壽終正寢。
假如呢一刻，有個闊佬睇中咗我，想包養我，酒樓都應該肯賣。
但我地又唔係色彩斑斕嘅靚魚，點會有人想養？
唉，做人樣衰，都只係追唔到女仔；做魚樣衰，分分鐘連命仔都無埋。
外在美唔係咁得，就要令人留意我嘅內在美。
