呀蛋又再次失戀,好彩呢次大家玩埋都唔夠2個月。
我知道佢心有不甘,佢唔想認,我亦唔會去拆穿佢,雖知道感情嘅野,人總要有個呃自己個方法去比自己舒服啲,老佛心理學上所講嘅防衛機制都係因此而黎。
不過我有句格言:呃自己無問題,知道自己呃自己就得啦。

*條件上的問題*
條女同完呀蛋分手無耐,其實已經有另一條仔,身形外表的確係比呀蛋差,但人地個銀行戶口就夠哂門當戶對。
呀蛋仲係成日好不甘心咁講:「依家有錢就得架啦!」

「其實係架,咁你努力啲搵錢囉。」我冷淡咁講,佢知道我唔呵佢,就繼續發下脾氣。
我就問佢:
「如果佢係搵個靚仔過你,但無錢嘅,你係咪會鋸啲?」

「嗯,好過啲囉」

「on9!就算佢搵邊個你都係唔會鋸。」

其實係,就算舊愛搵邊個都好,你自己個心都唔順氣
因為你仲未放低。

*等,不是責任是選擇*
「點解唔可以一路支持我呢?係咪全部人都係咁現實先?」
唔好睇呀蛋個外形咁Man,佢內心世界好多時同小朋友一樣。

「現實架,我地都好現實;如果佢唔係咁嘅外表,你都唔未必會選擇佢,同樣佢都未必會選擇你架啦。」

「唉,唔通唔可以一邊支持我,等我事業有成……」

「其實佢無責任等你架喎,佢都有佢自己嘅生活,佢無必要將自己嘅青春送比個唔知將來會點嘅人架。」

「唉,都係錢嘅姐。」

係架,真係錢架。
人就係咁現實架啦,唔係女人,男人都係。我地每個人都著自身嘅條件,有利有弊。愛情開始剛開始嘅時候就一種選擇,而唔係責任,所以我都會提醒住自己嘅朋友(特別係男性)有個鍚自己嘅老婆就唔好出去玩,因為你老婆唔一定會永遠咁愛你。

呀蛋唔明,仲係幻想自己仲可以過住童話故事嘅生活,我唔會怪佢,失戀心情難受,我體諒佢;但如果仲覺得呢個世界有著無私而天真嘅愛情,我只可以答佢情況有如等對粉紅嘅乳頭出現一樣。

女人係呢方面比男人清晰:我愛你,但未必真係可以同你一齊生活到,始終世界太多未知數。

相信一堆空頭支票嘅承諾,你保障唔到我,我亦都唔敢保障你。

「等」呢件字,從來都係折磨緊「等」個個。