到我呢個年紀,身邊嘅朋友大多數都係開始/已經結婚,而你慢慢就會係朋友嘅談話當中了解到更多我從來無想像過嘅事,婚禮本來係一場痛苦嘅咀咒。

*一場必蝕嘅演唱會-婚禮*
以由前淨係拎份人情去飲飲食食,到你身邊班朋友都開始求婚結婚,再到做兄弟,參與婚禮安排你就會深深體會到搞婚禮真係一樣好折磨人嘅活動。

幸運嘅,兩個人都有共識知道點搞,分岐唔太大。多數都係一個想搞到好好睇睇,另一個就唔想點洗。
唉,所以話,人生有錢係幾好,但無奈嘅係你同大多數人都係一等窮人,辛辛苦苦儲返黎嘅個十零廿萬就拎左去搞場必蝕嘅演唱會。

呢種「演唱會」唔係因為你好想搞,而只係有人想你搞。

富爸爸依家連囡都生埋,但次次同我傾計個陣都必須屌一次:
「真係好撚煩,有時都我唔明到底係我結婚定係佢地結婚!」

佢地當然就係指雙方家長。
如果你已經結婚相信你就好明白我呢句說話係咩意思。
如果你係打算結婚嘅朋友,
第一戒就要記得:千其唔好相信「無所謂」

*話哂係你地婚禮,你地自己決定啦*
T仔就快結婚,佢同我一樣都係肥料層,婚禮嘅事兩公婆當然就想慳得就慳。正當T仔收到長輩們話由佢地自己決定所有野嘅一刻,立即放下心頭大石。
不過佢仍然都係少年,太天真。

「下,個菜單好似唔係咁好啵。」

「八姨婆要請埋喎。」

「唔得,呢D傳統野一定要搞架。」

所謂嘅「無所謂」,其實就係要你地搞掂哂之後比我過下目,再由我作最後決定。

T仔已經中咗呢種痛苦嘅咀咒,慢慢佢都知道決定權早就已經唔係佢地兩個手上。

*那怕只係一小步*
婚禮原理就係新人負責出錢出力搞,幫自己父母長輩拎光環,但唔好以為痛苦嘅咀咒,到你搞掂完就可以無事。
因為呢家野,唔係話下下過得自己個關就掂,最重要係要過到人地個關,人地個關過唔到,你下半世就有排煩。

富爸爸到依家都會比雙方家長得閒串下佢,個日婚禮無乜乜,無物物,人地個婚禮又乜乜乜。

「屌你咁想搞,你自己搞啦!!!」

無,佢無咁講,佢同我講姐,佢返到屋企都係死狗,四萬咁口。

「係既,係既,我個陣真係安排不周呀……係既係既。」

*心理準備*
所以我係到比少少心理準備比搞婚禮嘅朋友,除非你地兩位真係堅離地,否則你都唔好期待個婚禮會好浪漫好興奮,因為我每次見到新人搞婚禮個陣真係忙過黎明。
但刻骨銘心就一定架啦,因為你都要預左比班長輩指指點點,到你下半世都係咁。
就算你搞得點好,都會有人覺得唔夠好。

婚禮只係做比人地睇,真正婚姻係兩個人維繫,無謂因個演唱會唔夠精彩而搞到兩個人都無哂癮。

但可惜最仆街嘅係,到你結完婚生仔,另一款痛苦嘅咀咒又會由佢地開始比你地。

(不過我都係到祝福各位結婚嘅朋友幸福快樂)