第一次一個人食爭鮮，係兩星期前既事。
屋企附近其實開左爭鮮好耐，但一直都唔敢一個人入去。
怕，係因為怕瘀，怕被人笑。
最後望左好耐終於鼓起勇氣入去，因為單純見到有唔少一支公係度食緊。
估唔到呢次之後，爭鮮成為我減壓既一個地方。
唔好誤會，我唔係要賣廣告。
我諗大家都知，爭鮮限時只有40分鐘，所以入到去好自然會擺低部手機，
然後全神貫注留意面前既輸送帶。
或者咁講，爭鮮比左個機會我放低手機40分鐘。
呢40分鐘入面，我見到有啲食客好擒青咁一碟接一碟咁食，一分鐘都唔想蝕咁。
但我就反而鐘意靜靜咁望著有咩壽司經過，想食先至拎。
可能有人會覺得我傻，點解唔食快啲把握時間。
如果連食飯都要咁"把握"時間，唔可以放空下自己，我諗我會好快顛。
係呢兩星期入面，我已經食左幾次爭鮮，初頭以為自己貪得意，
但今日先諗到可能因為壓力大，想放空下自己。
係呢40分鐘入面，除左可以有機會放低部手機，
仲可以認真咀嚼下自己到底食緊啲咩。
平時反工食lunch，每次都趕頭趕命，一係就無咩時間食，一係就有工作趕住做，
總之就食左咩都唔知，但求快同簡單。
但而家去食爭鮮，我可以認真諗下自己想食咩，唔洗理人點諗自己，
拎左碟壽司反黎，我仲可以慢慢食，起碼知道自己食緊咩同食到自己想食既野。
好似我咁，我去食爭鮮會一反常態，鐘意食小食同騎呢野，
最近就食過沙律同紫薯壽司。
聽個名可能大家都覺得我奇怪，好食唔食，食啲同壽司唔match既野，
不過你問我，我反而專試騎呢野，唔係話要標奇立異，而係平時又有幾何有機會食到?
況且試新野又唔洗死，或者係我份人比較古舊，唔鐘意試新野，
係食野既時候先有反少少勇氣去做反自己，而唔去理人地點睇我。
或者咁講，點解我會將爭鮮當成左一個減壓既地方，
我諗係因為係平時生活入面無咩機會可以放空到自己，
有幾何食野會唔睇住部手機呢?
40分鐘，未食前我會覺得時間好短，趕頭趕命咁食為咩。
無錯，如果多過一個人去食，時間係唔足夠的，因為掛住傾計都無左一半時間。
但當試過一個人食之後，我發現其實40分鐘岩岩好。
呢40分鐘可以比到一個小息我去放空下，面對下自己。
而且可以暫時咩都唔洗去諗，只係需要專心去諗下自己想食咩。
雖然40分鐘後我要面對反唔想面對既生活，但至少都有個機會比自己輕鬆下。
係香港呢個社會入面，如果可以做到40分鐘既自己，可能都係一件好奢侈既事。
