不經不覺,原來仲有兩年就到達人人口中所謂既三十大關。
明明仲覺得三十歲係一件好遠好遠既事,
但係現實總係殘酷,兩年後就正式去到呢個關口。

有好多人都為左呢個關口而準備,
身邊唔少女性朋友早係三十大關前已經結婚生仔,
有啲更加快到一年內完成哂結婚同生仔呢兩件人生大事。
雖然佢地話唔係為左趕時間,可能係早啲生仔早啲復完等等原因,
得罪講句,以上都難免令人聯想到同呢個關口有關。
又或者對一啲連拖都未有得拍的單身人士造成一定程度的恐慌。

係工作上面,身邊既朋友唔少已經去到高位,
就算唔係高位,人工都有番咁上下,做緊一份大家口中所謂的穩定工作。

當身邊既你、你同你,都做緊以上既野時,又有無人係例外呢?

有,一定有架,不過唔會夠膽聲大大走出黎講。
點解阿?明明無做錯野,但就好似做左件千年錯事咁,開口都有難度。

明明只係一個再也普通不過的數字,一個連小朋友都識的數字,
竟然會帶來咁大的恐懼。
老實講,如果我話我心口寫個勇字去衝關就呃你既,
我寫呢篇文亦都唔係話要散播咩野無謂的恐懼。
只係想帶出除左以上所講一般人認為的成功人士外,
其實仲有好多高不成低不就既人。

呢類人係畢業後轉左N次工,轉極都好似轉唔到一份心水既工作,
讀書時讀某一科,天真地以為自己以個行業為終身職業,
點知出來工作先真正知道自己係何其既渺小,
當初係幾咁天真。
一直以來以為係自己最鍾意最理想既工作,

點知係同一行係咁轉工,安慰自己只係未遇到岩自己既工作姐,
我仲可以撈呢行飯既,點知越做越唔對路,
最後迫不得已要裸辭,諗一個永遠都諗唔掂的問題,
"我到底適合做啲咩工?"
呢個問題同取西經一樣困難,起碼唔係一時三刻可以有答案。

另外,呢類高不成低不就既人,一係就無拖拍,
一係就拍左好多年但都仲未結婚,
每次同學聚會,由以往講理想講熱血,
慢慢變成講結婚、生仔、買樓,人工等等,
試問呢類人又點先較到個岩既台去傾呢?

講到呢度,唔好誤會我對呢類人有啲咩偏見,
因為我自己都係呢類人。
雖然三十呢個關口就到,但我好想用呢篇文章同我都係同類既朋友講,
三十其實並唔可怕,雖然我地暫時未能成為所謂的成功人士,
但調翻轉去諗,好彩我地三十歲前有機會比自己去諗下到底自己想點,
如果三十歲以後有埋家庭,到時就真係諗都唔會有機會,
因為為左家庭,份工幾辛苦都要頂硬上,
想裸辭?諗下好啦。

所謂高不成低不就,其實都係人地安個名比我地姐,
最緊要我地知自己做緊啲咩,
身邊無人明唔緊要,雖然係會唔開心,會比人批評,
但起碼你唔會後悔。

當然,我都唔係鼓勵大家唔理現實環境,
而係係現實環境許可下,係有限既空間同條件下,
盡量做多啲自己想做既事,
如果有野想學就去學啦,
如果想一個人旅行就出發啦。
而家唔去,唔通等到老左先做?
到時又會有好多借口比自己唔做。
最後年紀大時睇番轉頭,你就會發現你既人生,
原來只係得番工、放工、結婚、生仔。
咁樣既生活唔係話唔好,
只係如果大家係以上四樣之外,仲有野想做想試,
咁就不妨去試下,
永遠行動先至最實際,
試左唔得無人會笑你,但你唔試就話唔得,就一定有人笑。

我覺得能夠發現到自己到底想要啲咩係一件唔容易既事,
而發現到之後落實去做就更加唔容易,
所以趁仲有兩年先至正式三十,
與其坐係度同人比較有幾多,
倒不如認真諗下我到底仲差啲咩。

三十並唔可怕,
可怕既係我地坐係度咩都唔做,
慢慢等待三十個日既來臨。