上集：https://post.shikoto.com/posts/133734-我老公養咗條蛇（上）

此後，我同老公嘅鬥法正式開始。
我不斷搵人捉蛇，老公不斷買新蛇，唯一得益嘅，係我個蛇王朋友，不停拎啲蛇去賣。
咁樣拖落去，唔會有結果。
要令老公心甘情願唔再養蛇，就要令佢明白蛇有幾恐怖。
佢不停話佢啲蛇無毒，咁我就搵條有毒嘅畀佢。

有一次，我老公新買嘅一堆蛇入面，有一條青色嘅蛇。
我做咗好多資料搜索，發現呢種無毒嘅青蛇，同有毒嘅赤尾青竹好似樣。
而赤尾青竹毒性又唔係好強，唔會一咬就死，用黎畀老公一個教訓就最岩。

於是我搵蛇王朋友，幫我搵咗條赤尾青竹，趁我老公唔喺屋企，換走咗飼養箱果條無毒青蛇。

過咗幾日，都好似無事發生。
唔知係咪我老公一次過養太多蛇，或者不斷買新蛇，根本無發現有條蛇俾人換咗。
但係有一日番到屋企，我見到老公瞓喺床上，叫都唔醒。
報警、白車、搶救無效，死因係俾毒蛇咬死。
原來我老公一直無發現條毒蛇，所以佢餵蛇果陣，俾毒蛇咬咗一啖，都無太在意，就去瞓覺，就咁一睡不起。

警察查案，發現我老公不斷從黑市買蛇。
所以呢宗案件，就被定性為買家從黑市買蛇，賣家唔小心混咗條毒蛇喺裡面嘅「意外」。
我老公為咗激我，從各種門路買咗好多平價蛇，所以連果個「賣家」都搵唔番。

番到空盪盪嘅屋企，我應該有咩感受？

我知道自己應該悔恨、應該自責，但呢一刻，我覺得鬆一口氣。
終於無人日日同我嘈，無人篤眼篤鼻，成個世界清靜晒。
原來我同我老公嘅關係，已經差到......佢死咗我覺得開心。

由於屋企空盪盪，我唔使同老公鬥黎鬥去，又多咗時間，所以我開始......養蛇。
喺同老公鬥法嘅過程入面，我被逼不停接觸蛇，不知不覺間，已經唔再驚蛇。
加埋不斷搵同蛇有關嘅資料，我覺得我最熟悉嘅寵物，就係蛇。
養蛇之餘，我仲開始研究蛇，拍片寫專欄，教大家分辨有毒同無毒嘅蛇。

原來，我同我老公嘅問題，唔在於養唔養蛇，而在於我地都唔肯尊重對方，只係一味想自己贏。
人類總係習慣將問題歸究於其他人，而唔承認自己有問題。
我忽然諗起一句金句：「呢個世界上，好多問題都解決唔到，最有效嘅方法，就係解決提出問題果個人。」

－完－