我同我老公關係一向唔多好，不過無乜嘈交，應該話，嘈都懶得嘈。
本來以為咁就一世，直到有一日，我番到屋企，循例望下我老公。
唔係含情脈脈果種凝視，係確定下呢個人仲未死而已。
點知，我見到佢手上繞住一條蛇，斑斕嘅顏色，睇落濕漉漉嘅表皮......
「呢個係我BB，佢叫花花。」老公笑得好燦爛。
果一刻，我全身嘅汗毛都豎起晒，我甚至覺得，就算佢攬住第個女人，我都唔會有咁大反應。
「你係咪傻咗？」我一路講，一路退後。
「唔使驚，花花無毒架。」
無毒就唔使驚？曱甴都無毒啦，我咪一樣驚。
「驚」係一個情緒反應，而唔係好理智計算，呢樣野對你有生命威脅先會驚。
我好強硬咁講：「我唔理，你同我掉咗佢！」
原來，我老公去朋友屋企食飯，發現朋友有養蛇，然後一見鍾情，就用咗幾萬蚊去買條名種蛇，再學埋點養。
雖然老公通常都擺條蛇喺飼養箱。但我以前喺網上見到蛇嘅相，都會快手熄咗佢，
依加要我同條蛇一齊住，出入都見到條蛇，再咁落去，我一定會精神崩潰。
呢件事我同朋友商量，有人覺得無所謂，「妳咪當佢養貓養狗」；又有人接受唔到。
我發現，接受同唔接受，只係視乎果個人驚唔驚蛇。
假如我老公係養咗個女人，我接受到，都唔會嘈交。
可能呢個都係婚姻大關口，一般人三十歲結婚，人生仲有好長，婚後先發現自己嘅興趣都好正常，但另一半又配唔配合到？
道理還道理，呢一仗，我一定贏。
既然無辦法勸服我老公，我就用強硬手段。
趁老公唔喺屋企，我搵個做蛇王嘅朋友，上黎捉走條蛇。
夜晚老公番到屋企：「我條蛇呢？」
碗蛇羹根本唔係用佢條蛇整，不過，重要嘅係態度。
你養一條，我消滅一條！
我老公好嬲咁望住我，但係佢一句聲都無出。
我以為佢嬲幾日，下咗啖氣，就當無咗件事。
點知有一晚瞓到半夜，突然覺得手臂好痕。
一打開眼，就見到兩條蛇，各纏住我一隻手臂，喺度爬下爬下。
「啊！」我相信我嘅尖叫聲，連隔離屋都聽到。
之前屋企雖然有條蛇，但我儘量遠離，更加無掂過。
果一刻，我覺得果兩條蛇好似喺我心底爬過，將我骨子裡嘅恐懼喚醒。
老公坐喺我隔離，笑得好燦爛：「呢兩條蛇先幾百蚊，妳鍾意搵人捉就捉啦，不過妳捉兩條，下次就會有三條。」
此後，我同老公嘅鬥法正式開始。
我不斷搵人捉蛇，老公不斷買新蛇，唯一得益嘅，係我個蛇王朋友，不停拎啲蛇去賣。
咁樣拖落去，唔會有結果。
