我有兩個呀哥，因為父母係我地細細個時就離左婚，而佢地兩個個都唔想養我地，於是就將我地送左去社福機構，自此我就冇再見過我父母。而我地3個人由細細個開始就相依唯命，18歲後我地一齊搬出社福宿舍，一齊住係一個公屋，直到而家大家出黎做野都係一齊住。我地3個既感情好好，咩事都會有商有量，雖然有時都會有啲爭執，但好快就會無事。而最近我有一件事對我二佬好不滿，就係佢成日帶女朋友上黎過夜。我返工返朝早7點既，比大佬、二佬早起身，出門個時佢地都仲未起身。而我起身梳洗既時侯就feel 到有人係屋入面走動，出門既時候就透過門口塊全身鏡見到有個女仔行入左廁所，我見到佢既背影，高高瘦瘦，長髮及腰，著住短褲，露出白白滑滑既長腿。我認得佢就係二佬個女朋友，最近朝朝都見到佢，咁我每次趕住出門同埋怕尷尬，就冇同佢打招呼。而且我好不滿佢成日上黎瞓，好想話我二佬︰我地之前三個明明講好左帶人上屋企要單聲先，而家得你一個人住咩！如果間中都算啦，呢排仲要日日都係到過夜，你地係咪想同居先？係既話就搬出去啦！我冇心理準備要同阿嫂一齊住架！咁唔方便。
但平日我收工返到屋企，二佬就未收工，二佬收工返到屋企我又瞓左，於是我就諗住等星期日大家都放假先再話佢。終於到左星期日，我地3個難得叫外賣坐底一齊食晚飯。
一面食，我一面講：「二佬呀！我之前咪講好左帶人返黎要單聲囉！你呢排日日帶你女朋友上黎過夜想點先？」
大佬聽到都覺得有啲不滿咁講：「係囉！細佬，你攪咩呀！佢成日上黎，勁唔方便囉！」
聽到大佬咁講，我都唔避忌咁繼續爆自己既怨氣出黎，講：「係呀！係呀！如果你地要結婚或者想同居就搬出去啦！我真係唔想同呀嫂一齊住，屋企多個人，咩都爭一餐，我死都唔制架！」
大佬又講：「係呀！細佬！唔係我地想話你，咁樣都係為左大家好，廢時等時有咩爭執，傷我地兄弟情！」
二佬聽完我地呻之後，竟然好難得咁咩都冇反駁，默默咁點頭，神色凝重咁講：「我知道啦！我會叫佢唔好再上黎架啦！」
咁我見佢好似有啲悔意咁，都冇再話佢。
但到左第二日，佢女友又再黎過，我出門個時又透過門口塊鏡見到佢行入廁所。我見到真係好嬲，尋日先話完，第二朝又黎過。二佬真係當我講野冇到架喎！不過，我都要留返啲面比二佬既，所以我冇直接去同佢女友講，亦冇同佢女友打招呼，我打算下次先再鬧二佬一獲。
個晚，大佬比二佬早返到屋企，而大佬都見到二佬女友仲係日日都黎，都覺得好不滿，於是就同我一齊等二佬返黎。而二佬夜晚1點到返到屋企，見到我同大佬坐左係廳，問：「做咩仲唔瞓？等我呀？」
我嬲嬲地咁講：「你話呢？早幾日你明明應承左我地唔再帶你女友上黎過夜。但我呢幾日朝朝都見到佢。你想點先？」
二佬聽到之後，表現得好驚訝，神色又變得好凝重。
大佬接住苦口婆心咁講：「細佬呀！老實講，你地係咪想結婚先！係就而家準備搵住既地方啦！你睇我地個細妹性格咁倔強，一齊住的話，等時實同我弟婦有爭執。咁對大家都唔好，係咪？」我聽到就係旁邊猛點頭，我平時連呀哥都唔讓，可況係呀嫂。
而二佬就一副欲言又止咁既樣，講：「其實⋯⋯我同佢一個月前就分左手⋯⋯因為⋯」
二佬仲未講完我就叫定停佢：「停⋯我唔想知你地點解分手，咁點解佢仲日日上黎，你比左屋企鎖鑰佢？」
二佬應該自知理虧，細細聲咁答：「係！因為之前貪方便就配多左條比佢！」
大佬︰「咁樣你真係好唔岩啦！完全我都唔尊重我地。」
二佬聽完一面內疚同抱歉咁講︰「sorry ar！我發誓冇下次，我已經whatsapp 左佢叫佢還返鎖匙比我同埋唔好再自己上黎架啦！」
聽完二佬咁講，我一諗到原來個女仔係自己偷偷走上黎我就更加驚啦！我對大佬二佬講︰「佢咩人黎架！分左手仲偷偷走上人地屋企，都唔知係咪有病！佢未還返鎖匙前我地前都要小心D呀！唔係啦！我今晚收工就即刻換左把鎖佢。」
而個晚我冇瞓到，眼光光望天光，始終個女仔同我二佬分左手仲偷偷走上黎，一定不安好心啦！件事攪到我成晚都唔敢瞓，淨係係床上聽住出面有冇開門聲。我第二朝一起身，又即刻走去望下廚房同廁所有冇人。係自己屋企都要咁提心吊膽，都係全拜二佬所賜，我心諗就算呢件事完左之後，我都會有一排唔會比好面色比我二佬睇。
檢查完今日個女仔冇到黎之後，咁我就安心咁去換衫梳洗，準備出門返工。但，就係我準備行出門口既時候，我又透過門口塊全身鏡見到個女仔行左入廚房。
明明岩岩我檢查曬架啦！究竟佢岩岩匿埋左係邊，點解岩岩見佢唔到。咁而家既然知道佢係不請自來，又撞正佢上黎，我就當然來勢洶洶咁衝入去廚房諗住搵佢當面對質，趕佢走啦。點知當我行入廚房，入面竟然一個人都冇，之後我又係屋企搜左一轉，咩都冇。
我笑左笑，可能自己嬲得制，變得有D神經質，先會眼花睇錯。於我又準備出門，但，我又見到二佬女友既身影出現左係鏡到，今次行左入廁所。
#有興趣可讚黑柴Facebook
https://www.facebook.com/黑柴-879053098899020
