終於到左星期一。
以前每逢星期一小弦都會胃痛，因為星期一代表數學補課。
每次補完數小弦必定會留低再問阿SIR數，佢次次都係最後一個走，但小測成績仍然次次全班最低分。對於科科成績都唔錯嘅小弦黎講，真係好大打擊。
尚志同小弦關係上嘅突破，都係因為佢啲數，實在太屎。
有次數學補課完左，尚志發現留左手機係班房，番到去見到小弦自己一個係度喊，就關心下佢。
「頭先阿Sir問我，會唔會考慮轉去同隔離班同學一齊補數，程度會淺啲，唔洗迫得自己咁．．．辛．．．苦．．．」小弦一路講一路喊，「嗚．．．」
從此，尚志就孭起左教小弦數嘅重任，星期一補完課，仲會留多一陣教佢。係果段日子，尚志花係教小弦做數嘅時間，仲多過佢自己計數嘅時間。教完數，就一齊走，行到路口先分開，個個禮拜都係咁。
「我以前覺得你份人好cool，又成日同我爭，好唔鍾意你，但而家先知原來你份人都幾好，．．」天色開始昏暗，兩個人並肩而行，路上有風聲，同風吹過鳳凰木時沙沙嘅聲音。
「我份人不嬲都咁好咖啦。初中果陣，我見你介意同學攞我地黎笑，我先扮cool。」尚志停左一陣，「其實呢，我都唔係想同你爭咖，我真係有諗過，不如考差少少，等你唔洗次次考第二，但係．．．估唔到你啲數真係咁屎．．．」
小弦靜晒，尚志知自己講錯野，馬上轉話題。
「你肚唔肚餓? 我請你食野。」咁啱路邊有檔雞蛋仔。
「你請呀？」
「係呀！你鍾意食雞蛋仔定夾餅呀？」
「嗯．．．」小弦好認真諗。
尚志心諗，洗唔洗咁認真?
「我鍾意食．．．雞蛋仔。」
「太好啦，我都係。」於是尚志買左佢地第一底雞蛋仔。
從此以後，逢星期一買一底雞蛋仔兩份食，成為左佢地嘅習慣。
可能就係因為呢底神奇嘅雞蛋仔，小弦逢星期一都有嘅胃痛不葯而癒。一定係因為底雞蛋仔啦，一定係。
呢個星期一，唔知點解，胃痛又番黎。而家唔洗上平日啲堂，補課係上晝，唉呀，檔雞蛋仔未開！
其實小弦同尚志一向係班房都好少交流，到補完課小弦都唔知其實佢有冇嬲。直到各自食完晏，去學校圖書館溫書，小弦先知，佢應該真係嬲。
小弦坐番平時佢坐個位，通常尚志一入黎就會坐佢隔離，方便佢有數唔識可以問。但係今日尚志一入黎，望左小弦一眼，就行開，坐左係圖書館另一邊。
小弦完全集中唔到精神溫書，望住堆數，個胃拿住拿住痛。
「喂！」一把好熟嘅聲音向小弦耳語。
「吓！補課你又唔番，你晏晝番黎做乜呀？」
「你個尚志哥呢？」
「咩呀？你又想搞咩呀？」
圖書館嘅老師望一望小弦同小琴。小琴醒目地打一個OK手勢，示意佢會安靜。
小琴四圍望，終於比佢搵到背向住佢地嘅尚志。
「真係嬲呀？得，我幫你搞掂佢。」
「喂．．．」小弦捉都捉佢唔住，完全唔知佢又想點。
佢坐左係尚志隔離，係張紙上面寫左啲字，遞比尚志睇，尚志又覆番佢，張紙遞來遞去。小弦好緊張，拎番轉頭望住啲數學練習。
呢條題目，似曾相識．．．吖！尚志教過我．．．
Q19 你在某城進行房屋研究。已知第1年年終時所有房屋單位總樓面面績為10乘10的6次方平方米，隨後每年新落成房屋總樓面面積均較為前一年增加r%，現知第3年年終時總樓面面積為 1.045乘10的7次方平方米。求r表第2年年終時所有公屋單位的總樓面面積。
呢條數真係經典，唔知點解，果次尚志解極小弦都唔明，搞到兩個人都有啲忟。
「其實呢條算淺囉，點解你係唔明呢題呢？」
「算啦，我啲數係咁屎咖啦，你唔好理我啦．．．」
課室得番佢地兩個，兩個人都唔講野，靜得好尷尬。
小弦面紅紅，死忍住唔喊。
「喂．．．嬲呀？我語氣好重咩？」
「唔係，我嬲自己蠢之嘛。」
「．．．」
「．．．」
「一係我改下條題目，睇下你會唔會易明啲．．．」
「唔洗啦，咁夜，番屋企啦。」
尚志係張紙度寫左啲野，「嗱．．．」
「．．．」
Q20 你接受某男生每個星期幫你補習數學接近一年。已知男生中2下學期開始鍾意你，隨後每年鍾意你嘅程度，均較前一年增加N %，現知男生鍾意你已第3年，但你與他之間的交流仍然只有問數和教數，求男生心理陰影面積。
「．．．」小弦睇完捂住個口，面上兩行淚水係咁流，尚志手忙腳亂氹番佢。
之後，小弦就提出一齊入到港大就拍拖嘅承諾，尚志又傻更更應承左佢。
自此之後男生為左令自己嘅心理陰影面積唔好繼續擴大，就更加努力幫女生補數。
男生覺得自己有啲自投羅網，但係，又好開心。
呢個妹真係抵讚，經佢誠懇道歉，同埋講清楚上次佢扮鬼扮馬嘅事，係唔關家姐事之後，佢地又和好如初。妹妹仲多左番學校補課同溫書，雖然佢主要係想八掛家姐同尚志嘅進展。
到左四月尾，大部份同學都考完DSE。尚志就黎生日，一班同學想比個驚喜佢，就叫小弦約佢出黎。
「嗱，你打電話約佢出黎，等佢以為得你同佢，哈哈，然後我地突然出現同佢慶祝！」
「但係我29號仲有科經濟．．．媽咪一定要我留係屋企溫書咖。你地唔洗預我。」
「吓．．．尚志生日喎，冇你點得呀。」小琴在旁扇風點火。
「叫你細妹扮你留係屋企溫書咪得囉！」
「．．．」
「你要我扮乜都得，扮溫書… 佢真係坐係度十幾個鐘淨係對住本書咖，我扮唔到囉．．．」
「咁你扮小弦約佢出黎囉！」
「吓？咁好大鑊喎？佢真係會嬲咖喎。」小琴想起尚志上次黑晒面，猶有餘悸。
「點會呀？你扮真啲咪得囉。斯文啲，唔好吱吱喳喳咁，其實你唔講野就似你家姐咖啦，哈哈．．．」
「死人頭！」小琴好唔忿氣。
「喂？尚志？」小弦極不情願之下，打左電話比尚志。
「冇呀．．．28號你生日，我想約你去街。」
「吓？睇戲？」
「睇啦！應承佢啦！」一班損友猛點頭。
「哦．．．好吖。5點10，戲院門口等，睇完一齊食野？嗯，好吖，拜拜。」為免露出破綻，都係盡快收線為妙。
唔知點解，小弦覺得個胃又有少少拿住。
雙生-畢業生-下a: https://post.shikoto.com/posts/126244-雙生-畢業生-下a
多謝睇過呢個故事嘅每一個人，鍾意個故事嘅，請like 同share，仲有like/follow我個page~
https://www.facebook.com/miuyuwrites/
謝謝~
