當日天氣好熱，三月，已經咁熱。
果日係中六Last Day，一班應屆DSE考生趁住未考試，係呢日大玩特玩，直頭玩轉學校，四周圍自拍留念，又係同學件校服上面簽名。亦都有唔少師弟師妹趁最後機會同心儀嘅師姐師兄合照，當然表白嘅都唔少啦。
但係，對成級中六生黎講最期待嘅一對，竟然乜野風聲都冇… 真係令人有啲失望。
放學啦，一班豬朋狗友圍住男主角。
「尚志你…走…啦…?」
當大家仲不停影緊相，尚志已經影到悶，執緊書包。
「吓?係呀…」
「你會唔會有啲野未做呀?」
「Last Day你都唔同女神selfie呀?」
「唔係呀，應該係…你唔比係機會人地同男神selfie呀?」
「…」尚志一副冇佢地咁好氣嘅面口，攞起書包就行向課室門口。
「星期一補課見啦，你估真係唔洗番學咩?」
「喂…唔係呀?」
講起黎有啲老土，佢地之所以比人煲話係一對，係因為佢地係由中一開始就無一次例外，係全級考第一同第二名嘅同學。
其實講聰明尚志只屬於一般，但係佢做乜事都淡淡定定，可能因為咁，乜野考試呀比賽呀，對佢黎講都冇乜壓力，反而表現特別好，每年都考第一。女主角叫小弦，就同佢啱啱相反，資質一般，只係非常勤力，而且每逢考試就好鬼緊張，通宵溫書果種，佢嘅成績真係得黎不易。可能因為佢驚驚青青嘅性格，令佢一直都考第二，考唔到第一。
不過，冇人會留意呢啲分別，只係留意到佢地考第一同第二，仲有就係外型好襯，係咁多。
「家姐！」小弦係學校門口比佢個風頭躉妹妹小琴叫住。
「你終於走得啦？我以為你影相影到聽朝呀．．．」
「好煩呀．．．」小琴擺出一個非常不耐煩嘅表情。
「唉呀，佢地跟住黎！我頭先就係同佢地講話係你捉我番屋企溫書佢地先比我走．．．你千祈唔好踢爆我！」
「拜拜！」娘娘擰轉頭燦然一笑，手指指家姐，又伸一伸脷。
「我又會捉到你番屋企溫書囉，成日搵我過橋．．．」小弦自言自語。
「拜拜！拜拜！」幾個師弟依依不捨道別。
「行快啲！」小琴繞住家姐隻手，拉佢行快啲。
小弦同小琴其實係孖生姊妹，只係性格南轅北轍。屋企對佢地好嚴格，面對同一對虎爸虎媽，兩姊妹性格各走極端；一個極度聽話，一個極度反叛。小弦文靜內斂，小琴外向反叛；妹妹又玩劇團又搞學會，乜活動都有佢份，就係唔鍾意讀書；而家姐淨係專注讀書，乜都唔玩唔參加，淨係驚達唔到媽咪嘅要求。
雖然佢地生得一模一樣，但係單憑打扮就可以分到邊個打邊個：戴眼鏡、扎馬尾嘅就係家姐，唔戴眼鏡、條辮鬆鬆散散（更多時候係唔肯扎辮）嘅就係細妹，加上佢地舉止神態分別都幾大，學校基本上冇人會撈亂佢地兩個。
天氣真係好熱，好在放學嘅路上有少少微風，仲有路旁一排鳳凰木，有樹影遮蔭，都唔算熱得太辛苦。
「唉！」小琴行行下突然唉氣。
「下星期仲有補課喎．．．」
「你覺得我會番黎補課咩？」
「小姐，你同媽咪講左話會番咖噃．．．」
「唓，都唔計出席率啦．．．仲要係我最憎嘅數學．．．」
「你試下唔出現．．．你唔好成日激媽咪啦．．．」
「唔好迫我啦，我聽晒你話啦，我幫你攞書包啦．．．」小琴一路講真係一路扒左家姐個書包，一手抱住個書包，一手拖住家姐隻手，小弦完全冇佢符。
「唔得呀。」
「黎吖．．．」
「冇得傾呀，媽咪實問。」
「我幫你約男神去街吖。」
「你．．．唉。」
「喂！前面呀！」小琴突然有新發現。
「咩呀？」
「前面呀！呀邊個．．．」小琴指住前面十幾米嘅尚志。
「哦．．．咁又點呢？」
「你睇住．．．」小琴好快手扎起條辮，放左自己個書包係地，孭起小琴個書包，一手搶埋佢副眼鏡就跑向前，仲用左兩秒時間，咇左少少演技出黎。
小琴上前拉住尚志嘅手，尚志好似有少少愕然。
小弦呆左企係度，完全唔知點反應好。
小琴越挨越近，同尚志傾左一陣。
突然小琴回頭望左一下小弦，又望番尚志，用手扲住個嘴，好似有啲訝異，面都紅晒。
小琴低住頭，伸一伸脷跑番去搵家姐。
「唓，咁都認唔出我係細妹，仲想追我家姐．．．」
「你．．．你地講左啲咩?」小弦塊面青晒。
小琴面上露出狡猾笑容。
「我本來呢，就想幫你約佢聽日補完課一齊去飲野．．．」
小弦好緊張咁望住細妹。
「跟住呢?」
「點知呢．．．嘻嘻．．．」佢忍唔住笑。
「佢本來係應承左咖．．．跟住呢．．．」小琴極力忍笑，「佢爆左個天大秘密比我知喎．．．佢話呢．．．」
小弦塊面好似黑板咁黑。
小琴繞番住家姐隻手，扮男仔聲咁講，「我地上次唔係講好左，如果我地一齊入到港大，先拍拖嘅咩？點解而家你．．．」，又用番自己把聲問，「佢講嘅野係唔係真咖?」
小弦雙手掩面，無晒反應。
「我地一世人兩姊妹你咁樣暪住我？你知唔知我比全級問勻晒，連你班主任都問我你地係咪有野呀！我都話冇呀！一句講晒，你．地．係．唔．係．有．野．先？」
小弦無奈點頭，成個人好似虛脫咁。
「吖！你地好純情呀！ 好正呀！」小琴發晒癲，「你唔好話比我知全級而家得我知呢個秘密呀？」
「就黎全世界都知啦，你咁大聲．．．」
「你放心，全世界都可能知，我地呀媽呢，一定唔會知學校有男仔係考DSE前追佢個寶貝女!」小琴抱番起自己個書包，比番個眼鏡家姐，一手搭住佢膀頭，「咁當然啦，我呢，番唔番補課．．．佢當然都唔會知啦．．．」
「而家連我都唔想番補課啦．．．」小弦心諗，下次見到尚志一定好尷尬，唔知佢會唔會以為自己夾埋細妹整蠱佢。
「家姐，唔好亂諗野啦，咁熱，我地去食雪糕吖!」
