平凡的人，不平凡的愛 (上)

鋒馬跟大家分享—個故事:

(這故事，係我最早期，未開始寫其它故事之前的作品，今次更正番很多錯字别字再回味，仍然覺得很有意思，雖然，表面只是極其平凡，但是，卻能畀到自己—份深入感受，所以亦想貼出跟「同 channel 」者分享，至於是甚麽感受？我在此先賣個關子，到故事完結之後，再跟大家分享。希望，讀者能「捱」到最尾啦，哈哈。故事原名為「街市」，現改名為「平凡的人，不平凡的愛」，是想給讀者們的—點提示。 )

話說。。。(又或者說)，是咁的，

~ 某年前，油麻地街市 ~

阿榮當年四十歲，喺油麻地街市賣豬肉已經好多年，檔豬肉舖係佢老頭子剩落畀佢嘅。

因為佢老母跟佬走咗，所以阿榮就由細到大都跟住老竇喺檔口賣豬肉，可能由細到大食得肉多，體形偏胖，五短有力，粗豪老實型，小學後就冇乜揸過筆。

阿蘭剛過三十八，因老竇早過身，屋企嘅田就由佢嚟耕，日灑雨淋，因耕田勞苦多年下，皮膚黑瘦，但尚算健康。

多年前因政府新界收地發展，雖得到筆錢，但因送細佬妹到外國讀書，所剩下嘅，就只夠阿蘭喺市區投個檔口賣菜，因為隻字不識，只有跟以前農民朋友攞菜去賣。

阿榮每星期工作七天，閒來娛樂就只有晚上飲啤酒睇波，有時賭波贏咗錢，或過年過節，就到就近嘅一樓一鳳招妓慶祝吓，兼夾滿足身理需要。

阿蘭相貌平庸，身材黑瘦見骨，一來忙於搵食，二來從未有男人追求過，所以到這個年齡，仍是單身。

六嬸喺油麻地街市擺檔幾十年，同豬肉榮死鬼老竇曾經有過一手。因同是賣菜，阿蘭初到街市時，有很多嘢都係靠六嬸指點。

後知阿蘭仍是單身未嫁，又想起阿榮未娶，始終都算係老相好個仔，於是就打算介紹二人相識。

阿蘭覺得女人始終要有頭家，細佬妹亦已長大成人，阿榮也樂得有人洗衫煮飯，醒起老竇臨死時交帶落，有後為大，本來諗住過多兩年，就返大陸娶個出嚟，現在樂得方便，所以大家同意下，就飯局相睇。

大家亦明白已非十八廿二，自己亦冇乜要求權利，求其對方有齊眼耳口鼻，身體健康，就已經足夠。