上集：https://post.shikoto.com/posts/121208-我男朋友係人狼（上）

不過，之後阿東每次變人狼，我都會陪住佢，可能觀察得多，會諗到辦法呢。
我開始發現，只要餵飽咗佢，佢就唔會咬人。
於是每次，我都預早綁住阿東先，等佢變成狼，再餵一堆生肉。
到佢食飽，我就可以放開佢、摸下佢、同佢自拍。
有一次，我唔小心擺咗一張自拍上網，點知一堆人留言：「妳養咗隻哈士奇？好大隻，好可愛啊！」
我鬆一口氣，好彩大家都先入為主，唔會覺得，香港室外有隻狼。

上次呃咗咁多Like，我食髓知味，等阿東再變狼果陣，我開始講啲簡單指令。
佢雖然有獸性，但骨子裡始終係人，聽人話都聽得幾好。
轉圈圈、簡單數學、擺下pose，完全無難度。
我幫佢拍片擺上網，呢隻「聰明哈士奇」好快紅咗，好多人催我擺新片。

我從來都無獲得過咁多關注，自此之後，每個月農曆十五，就成為我最期待嘅一日。
我會準備好題材，喺果一晚儘量幫佢拍片影相，仲出埋明信片、寫真。

阿東初時不滿，但隨住名氣帶來嘅，就係錢。
為咗安撫阿東，「聰明哈士奇」所有收入，我都交晒畀佢，始終佢先係果隻「哈士奇」嘛。
我享受嘅，係果種被關注嘅感覺，出街都有陌生人同我打招呼：「妳隻狗狗好聰明！我好鍾意睇妳啲片。」
我無比慶幸，我有一個人狼男朋友。

直到有一晚，農曆十五，阿東請我去當日果間酒店，話有個驚喜畀我。
我以為佢諗到拍新片嘅題材，點知佢好興奮咁講：「我已經醫番好啦！」
「醫番好乜野？」我反應唔切。
「多得妳搞『聰明哈士奇』，我儲夠醫藥費，偷偷打針食藥，醫生話我已經好番，以後都唔會變人狼！」
以後......都唔會？

「我就係想畀個驚喜妳，我變番正常人，妳肯唔肯嫁畀我？」阿東跪低，手上拎住隻戒指。

我望一望個鐘，平時呢個時候，佢應該變咗人狼。
我忍唔住問：「咁我點同粉絲交代，隻『聰明哈士奇』去咗邊？」
阿東隨便答：「咪話死咗囉。」
「死死死，你咁無愛心架！」
阿東唔係好明：「我對邊個無愛心？我自己？」
我解釋唔到我嘅憤怒，但一諗到，從此我無「聰明哈士奇」，無人會再留意我，我會變番一個普通OL番工放工......
我望咗阿東一晚，佢都無變人狼。

第二日，我同阿東提出分手，話因為佢醫病前無通知我，覺得佢唔重視我。
我終於意識到，我愛嘅唔係阿東，而係人狼阿東。
或者，係果個好多人留意嘅「聰明哈士奇」女主人。

－完－