今日係我男友阿東生日，亦係我捉姦嘅日子。
前幾日，阿東就同我講，話今晚要開OT，唔同我過生日。
點知我無意中發現，今晚，佢訂咗酒店一間海景房，
證據確鑿，梗係「獨自去偷歡」啦。
但如果我依加拆穿佢，佢一定會狡辯，例如「有個朋友無信用卡，我幫佢訂房」。
所以，捉姦要在床。
我偷偷跟住佢，睇住佢check-in上房。
過咗半個鐘，果對姦夫淫婦應該調完情，除晒衫啦掛。
我大力拍門，阿東慌張咁開門，呆咗：「點解妳喺度？」
「呢句話應該我黎問。」我一手推開佢，衝入房搵淫婦。
阿東急急腳跟住我，我知佢一定會講「妳聽我解釋」，然後話自己係第一次，以後都唔會......
點知佢拉住我：「妳快啲走啦！」
「妳睇下，今晚係月圓之夜。」
阿東指住露台外個月亮：「事到如今，我唯有講真相，我係一隻人狼，月圓之夜會變身。妳諗下，每逢農曆十五，我係咪都唔約妳？」
痴線，邊個記得農曆，我揭穿佢：「咁你除晒衫，下半身圍住條毛巾，就係人狼打扮？」
「咁我一陣要變狼，廢事撐爆啲衫。」阿東個樣好苦惱：「平時我都鎖自己喺屋企變狼，今次諗住生日享受下啫。」
阿東想拉我出門口，我先唔走，佢分明驚我搵出個淫婦。
我同佢拉拉扯扯，突然間，我覺得佢手上毛茸茸。
我低頭一望，先發現佢下半身已經變咗狼，上半身好艱難咁講：「黎唔切啦，再唔走我會傷害你。」
我嚇一跳，當時都諗住走，但停一停，諗一諗。
佢係人狼，唔代表佢無出軌，唔代表間房無女人......或者女人狼。
我仲未睇個衣櫃！一時間，嫉妒心戰勝咗恐懼，我撲向個衣櫃。
打開衣櫃，空空如也。
背後傳來一聲怒吼，一隻巨形哈士奇向我撲來，我嚇暈咗。
醒番果陣，我係臭醒嘅。
我即刻搖醒阿東：「衰佬，做乜搞到我咁污漕？」
阿東翻白眼：「妳為咗捉姦，纏住隻人狼唔肯走，無咬死妳妳應該偷笑。」
有啲道理，咁點解我無事？我突然明白：「係咪你對我嘅愛，戰勝咗獸性？所以你已經唔再係人狼？」
「尋晚我撲上黎，諗住咬妳，點知妳嚇到失禁，搞到我成面都係......跟住我就嘔，嘔到暈咗。」
呢個講法真係好唔浪漫，我皺眉：「乜人狼都會嘔？」
「喂，如果妳諗住食飯，一啖咬落去變咗食屎，妳會唔會嘔？」
好啦，我地唔再討論啲核突問題，比多啲清潔費，就開始討論我地嘅未來。
「你個人狼病，有無得醫？」唔通下半世，都每個月變一次狼咩？
阿東猶豫咗一陣：「我搵過一個名醫，話可以令我唔再發作，但醫藥費好貴。」
我好緊張：「貴都要畀架。」
阿東嘆氣：「咁我拎份首期去醫病？妳寧願嫁畀有樓嘅人狼，定無樓嘅男人？」
佢又講得岩，人狼都係一個月變一晚啫，樓係日日都要住架。
一講起錢，我地兩個都無辦法，唯有得過且過。
不過，之後阿東每次變人狼，我都會陪住佢，可能觀察得多，會諗到辦法呢。
