好多人討論,揀另一半到底點揀好,
個選擇題通常係「靚女性格差VS醜女性格好」或「花心富二代VS專一廢青」,
優點缺點各一大個,令大家十分糾結,糾結到......好似真係有得你揀咁。

不過,依加真係有得你揀!
有間婚介公司,推出咗「任你加點活動」,客人將點數加落啲選項度,
公司就會配對符合條件嘅對象,包保合你心水!
經理解釋:「先生你有無打過機?通常會有點數,畀你加落力量、敏捷、防禦,
我地嘅設定都差唔多,不過選項就變成外表、經濟、專一同性格,每項滿分3分,有5分畀你分配。」
佢遞張表出黎:
「一、外表
0分:見到食唔落飯
1分:行出街無人望,會俾朋友笑
2分:打扮下都見得人
3分:樣靚身材正
二、經濟
0分:上有九十老母,下有三歲弟妹,成家都要你養
1分:勉強養得起自己,出街要你畀晒
2分:足夠一齊供樓

3分:有幾層樓揸手
三、專一
0分:日日去滾,會喺你面前出軌
1分:間中滾,儘量瞞住你
2分:受到極大誘惑先會出軌
3分:一旦揀咗,就百分百專一
四、性格
0分:自私橫蠻難頂
1分:勉強可以接受對方存在
2分:相處得幾舒服,間中吵架
3分:志趣相投,如沐春風」

我唔係好明:「性格點樣計分?人人需要唔同,甲之熊掌,乙之砒霜。」
經理解釋:「我地從大眾需要去分類,例如大部份男人,都鍾意性格溫柔、支持理解自己嘅女仔,咁就高分。
但都唔排除有啲被虐狂,揀咗個性格零分嘅虐待狂,咁就賺晒。」
其實我都係隨便問,有得揀,邊個男人唔會揀靚女?
我毫不猶豫加爆「外表」,剩低2分,猶豫咗一陣,就加埋落「專一」,我都唔想戴綠帽。
至於經濟同性格,幫補下女友有乜所謂,靚女就算發脾氣都靚,醜女煮九大簋都係黃臉婆。

無幾耐,婚介公司就介紹咗Jenny畀我。
Jenny真係好靚,靚到驚為天人果種,但佢窮都窮到驚為天人。

不過咁都有好處,我用盡積蓄,畀晒佢阿媽啲醫藥費之後,佢好快就同咗我一齊。
算啦,一個靚女經濟咁困難,都無諗過出賣自己身體,都好難得,
(男人「幫靚女講好說話」呢個技能,個個都練到滿級。)
拍拖洗費好大,佢出街只食貴野,郁啲就發脾氣,
為咗我嘅小公主,我做多兩份兼職,我相信我地一定可以幸福!

我一日瞓得四個鐘,佢仲要連果四個鐘都叫我送宵夜,遲半分鐘就鬧我。
我以為,只要係靚女,我乜都接受到。
我無估到,原來一個人唔夠瞓果陣,無論幾靚女都欣賞唔到,唔通呢個就係傳說中嘅「需求金字塔」?
我捱咗兩個月,開始頂唔順,我今晚特登請咗假,想同佢傾下。

為咗製造良好氣氛,我特登買咗9朵玫瑰,
電梯打開門,入面有個男人,佢手上拎住一大束玫瑰,99朵果種。
9朵對99朵,好尷尬,但唔入去仲尷尬,
99哥勝利嘅目光,就好似激光一樣射落我身上,令我不斷扣血。
更慘嘅係,99哥同我去同一層!今日真係黑仔。

同一層、同一條路,唔通Jenny鄰居有個有錢男友?
99哥率先撳門鐘,Jenny開門,大叫「BB」,接過佢束玫瑰。
然後,Jenny先發現到我,三個人六隻眼一齊望住我手上果9朵玫瑰。
明白晒,無野需要解釋。
果一下我好嬲,唔係嬲俾人呃錢、唔係嬲戴綠帽,而係嬲我明明加咗兩分落「專一」......
姐係你明明加晒點落防禦,做一隻防禦型坦克,點知個法師防禦都高過你。
我一直以為,就算同Jenny分手,都會係因為我頂佢唔順。
我無質問Jenny,我去質問婚介公司。

下集:https://post.shikoto.com/posts/120237-如果可以幫女友配點(下)