上集：https://post.shikoto.com/posts/117845-我老闆有超能力唔識用（上）

「我要一幅畫。」個男人畀錢。
老闆無畀任何一幅畫佢，反而打開佢個旅行箱，倒咗一具赤裸嘅女屍出黎。
男人點點頭，拖住空行李箱走咗。
唔通老闆買屍體黎做畫畫模特？咁點解係個男人畀錢老闆？
只見老闆將畫布蓋喺女屍上，用畫筆一掃，
女屍居然消失咗，變咗一幅女屍畫，好似我平日見到果堆屍體畫咁。

我明啦，老闆真係有超能力，
不過唔係畫物成真，而係掉轉版，將實物塞入畫中。
所以佢開呢間畫廊，幫人處理屍體，請我番黎加背景，只係令啲畫無咁突兀。

「邊個喺度？」老闆發現咗我，一步步行埋黎。
跟住落黎，一定係殺人滅口嘅決鬥，我尖叫：「啊，唔好殺我！」
「我點樣殺你？」老闆仰視我米九嘅身高。
「你......你可以將我擺落幅畫度。」
「活物唔擺得。」
咦，點解老闆咁輕易講我知佢超能力嘅破綻？
「我唔會殺你，但你都唔使指意報警，畫中嘅野，只有我先拎到出黎。」老闆攤手：「所以我地都奈何唔到對方，我畀多個月糧你，你走啦。」

「超能力一定要用黎做壞事？」
老闆有啲無奈：「咁你養我？我好似仲養緊你。」

我覺得老闆唔係壞人，我無辦法告佢，都唔可以睇住佢錯落去。
我突然講：「我見岩岩個客......畀嘅錢都唔多。」
老闆滿肚苦水：「搵食艱難啊，我又唔可以落廣告，只靠熟客，一個月有幾多單生意啫？熟客仲要壓價攞優惠，二屍同行一屍價錢......」
「你無諗過轉行？」

三個月後，迷你倉正式開業。
香港最缺嘅係乜野？空間。
我老闆根本有最賺錢嘅超能力，可以無盡空間。
無論幾多貨物，佢轉個頭就塞晒落幅畫度，節省空間得黎，又唔驚整爛。
邊個話，搵大錢一定要埋沒良心？

比超能力更矜貴嘅，係運用超能力嘅腦袋。

－完－