今日情人節，女友Gigi夜晚要開OT，所以我一早起身，陪佢食情人節早餐。
我準備好晒，連早餐都Book定位，買咗禮物，訂好花。
早餐食到一半，氣氛愉快，直到我收到一個訊息：
「尋晚喺你懷抱入睡，真係好溫暖，情人節快樂。」
邊個send黎架？我面色一變，Gigi伸個頭黎望下，即刻發晒脾氣。
「絕對係send錯！妳睇下，呢個號碼之前同我無交流過......」我低聲下氣，講咗一大輪，Gigi終於相信我嘅清白。
呢個時候，電話又震：「你送嘅心形頸鍊，佢鍾意嗎？我就好鍾意果個款。」
心形頸鍊......我岩岩送咗畀Gigi，做情人節禮物。
「佢好鍾意？你一款頸鍊送畀兩個女人？真係花盡心思喎，多謝晒！」Gigi一手扯甩條頸鍊，扔落地下，飛奔走咗。
我無追出去，因為我要賣單，相信男人都明白呢種無奈。
Gigi番咗公司，我亦死死氣氣番工，
當務之急，係要搵出整蠱我嘅罪魁禍首，同Gigi解釋。
我發訊息：「你係邊個？」
對方好快答：「我係最愛你、最了解你果個。」
得，佢唔肯講，使唔使玩到咁盡？
我尋晚絕對無同人瞓，疑點係，邊個知我送心形頸鍊畀Gigi？
我無同朋友提過，自己Search、自己買，
除咗我、首飾店老闆娘同Gigi之外，無第四個人知。
咪住，唔通係首飾店老闆娘對我一見鍾情，想拆散我同Gigi，乘虛而入？
因為訂貨，佢有我電話，好似好合理，
個號碼仲繼續發訊息畀我：「今日present，加油！」
「前幾日先睇完醫生，中午唔好飲凍野丫。」
我不寒而慄，好似有對眼監視住我咁。
我回覆：「今晚妳有無地方去？不如一齊過情人節？」
好快，佢send咗一間餐廳嘅地址畀我：「點會有其他地方去，我啲時間永遠留晒畀你。」
好，我就睇下你係何方神聖！
一收工，我就衝去果間餐廳。
我喺餐廳門口發訊息：「我著白色恤衫，妳到未？」
「望向你嘅三點鐘方向。」
三點鐘？即係餐廳入面？
我抬頭一望，就見到Gigi同個男人食緊燭光晚餐，你一啖我一啖......
佢又話加班？我想衝入去同Gigi理論，畀侍應攔住：「先生你無訂位，唔入得去。」
「我有朋友係裡面。」
「我地今日只做情人節套餐，未齊人唔入得座。」
咁樣擋一擋，我啲怒火熄晒。
頂綠帽咁明顯，我仲可以點理論？衝入去打架，只會俾人笑。
我不如關心另一個問題，我發訊息畀果個神祕人：「妳究竟係邊個？妳喺邊？」
「我就喺你手上面。」
手上？我咪拎住部手機......佢係我部手機？
而尋晚喺我懷抱入睡......我尋晚玩手機玩到瞓著咗。
「我同你朝夕相對，早就對你情根深種。我諗住默默守護你，但知道Gigi咁樣背叛你，我忍唔住！果種女人襯你唔起！」
我反問：「妳點知Gigi今晚約咗第個？」
「今朝峰峰話我知。」
人物多到我有啲亂，「邊個係峰峰？」
「Gigi部iPhone。」
我未反應得切，手機已經步步進逼：
「你揀我啦，世上除咗我，邊個可以分分秒秒，連去廁所都陪住你？
我唔會阻你上網睇靚女，我仲可以幫你搵圖，
你要聲音，我可以模擬；你要體溫，我可以發熱。
情人節，唔使傾家盪產、花盡心思，你只需要換個手機殼！」
咁樣講，佢好似幾多優點，
好彩我仲保留一絲理智：「痴線，我唔會搞人機戀。」
「你唔愛我，我生存仲有咩意義？」
「嘣！」
「特別新聞報導：一名男子手機爆炸，灼傷手指及臉部。
送往醫院時，該男子不斷聲稱，是手機求愛不遂，自爆報復。
有專家指，手機輻射有機會影響腦電波，令人產生幻想，
網友則認為，這種行為屬於『單身狗情人節妄想症候羣』，不少單身男女都有類似症狀......」
情人節快樂，
如果你未有情人，唔好忘記，仲有我時刻陪伴住你。
永遠愛你的手機上
－完－
