"I said YES!!"

踏進二十五歲後，Facebook頻繁出現類似feeds，開始麻木了。但，咦，定睛再看，是大學同學的status! 不是吧？她竟然會答應他求婚？而且沒有曬命鑽戒圖？

我很驚訝，因為那個她是個有名的港女，她對求婚絕對有要求，「求婚鑽戒一定要有一卡以上，(價錢)無(男友)三個月人工，我唔會嫁！」這是她在一次同學聚會，當一位女同學展示她細小訂婚鑽戒時吐出的狂言，眾男同學聽後噤若寒蟬。

當時她的男友是一位初出茅廬的事務律師，據她所言，月入平均約五、六萬吧，三個月收入足夠買D Color一卡以上的鑽戒了。如果求婚的是這位前度，不難理解她會接受。可是，現任男友是她的同事，據說收入比她還要低一點，到底是如何擺平她呢？難道她轉死性？

真相在她派帖時揭曉。

「恭喜晒你！好突然呀！」
「你係邊度擺酒呀？」
「JW Marriott。」
「嘩，咁咪好貴！幾錢一圍？」
「Around 20K，負擔到嘅，不過係難book啲。」
「你會喺邊度影結婚相呀？」
「歐洲啊。」
「嘩，貴唔貴？」

大家你一言，我一語。很快，已有女同學身先士卒嘗試將大家疑團解開。
「不如你講下佢點求婚啊？好想知啊！」
「其實都係簡簡單單咋。我哋咪去咗旅行嘅，嗰晚佢係酒店房擺咗束花，仲送咗個禮物盒。」

只是這麼簡單？和Facebook上見到的圖片內容一致？我和其他同學對視後，一致眼神交流——「有可疑」！

「咁個禮物盒入面有咩㗎？」

Bingo！只見她面上流露出得戚的神情，從銀包內拿出一個紙摺的心形，向大家展示。

「普通料嚟啫！」大家再次眼神交流。

「佢摺咗1000個心比我，好浪漫，我真係好感動。」

這個時候，一位眼利的女同學發現端倪，「咦，點解個心張紙有啲線咁怪嘅？」

「呢張係支票。」只見她緩緩打開心形。

Amazing！簡直是魔術！一張銀碼「520」的支票落入眼簾。

「Oh my god!」一眾女生不禁尖叫！

「我當時反應同你哋一樣，佢仲話：
「由我哋開始拍拖，我每日都儲起一個「我愛你」。今日係我哋拍拖1000日，唔知你願唔願意接受呢一千個心？嫁比我！」
你話佢係咪好有心思？」

1000個「520」，豈止有心思，簡直是一段可歌可泣的愛情故事！

不過，作為舊同學，我應否提醒她支票有可能...彈票呢？

還是不要掃興了。