讀U時聽「獸父」一詞就聽得多，沒想到職場上一樣有，只是睇下你好唔好彩，遇唔遇到。

之前Benson一直有意無意碰到我，例如教我用system時掂到手仔、行路唔覺意撞到個胸，我已經感覺唔對路。女仔的直覺好靈，如果男人有心抽水，我們是feel到的。只是，我一直視他為師父，而且他有個拍了九年拖準備結婚的女友，對他完全無戒心。

中午食食下飯，我同佢吹水，點知佢突然嚟料...
「聖誕有咩嘢做？」
「未諗到啊，你呢？你同女朋友去邊玩啊？」
「應該會去旅行。」
「好sweet喎。」
「其實你唔好睇我好似好幸福，我一啲都唔開心。」發生咩事？要我氹佢？想我問點解？但同事私事最好不要過問，我唔會中計嘅，我無出聲，耷低頭繼續食嘢。

「其實我唔係咁鍾意我女朋友。」咳！咳！嚇得我差點被飯嗆到。你究竟知唔知自己講緊啲咩呀？

作為女性，我聽到呢句真係忍唔住爆：「咁點解你同佢一齊？」噢，我中計了！

「我仲同佢一齊係為咗責任。」真心，我無興趣知。

佢繼續黯然道：「其實當初係佢追我先嘅，我拒絕咗好幾次，佢喊晒，我覺得呢個女仔好愛我。見到佢咁傷心，我唔忍心，最後一齊咗。但因爲佢屋企有事，我宜家唔可以同佢講分手。」佢講完就耷低頭扮傷感。

咩話？咪住先，唔忍心同一齊咗有咩關係呀？男士們，如果你們認為啲𡃁妹會信呢套，就大錯特錯啦，唔好當我地係白癡啦！我依一刻真係覺得佢好cheap，我戥佢女朋友難過。

「其實你係咪覺得我好衰呀？」

我唔知比咩反應，無出聲。

「其實呢，我鍾意啲眼大大、成日笑嘅女仔。」仲其實？！你食蕉啦！

「啊，我醒起我約咗個客，我返去先。埋單啦。」我急急腳閃人，真係聽佢講多兩句都浪費生命。

其實我知你想講咩！其實你想食咗我呀嘛！話時話，搵食唔該行遠啲，你唔信我會唱衰你咩！（宜家已經做緊！）

從此之後，我好怕再聽到男人，尤其是有另一半嘅同我講「其實」。